Comissão da Função Pública

Relasiona ho kazu asédiu seksual ne’ebé akontese iha Universidade Nasionál Timor Lorosa’e (UNTL) ne’ebé komete husi dosente nain rua hasoru estudante Komisaun Funsaun Públika fó sai ona desizaun.

Komisáriu KFP asuntu Disiplinar Agapito da Conceição esplika, kona-ba kazus disiplinares nian ne’ebé kontinua komete husi oknum funsionáriu balun hodi halo asediu seksual hasoru estudante ne’ebé akontese iha Universidade Nasional Timor-Leste (UNTL).

“Asédiu seksual ne’ebé akontese iha UNTL desizaun hatun ona ne’e bazeia ba rezultadu invetigasaun katak dosente na’in rua hetan pena disiplinar inatividade no suspensaun. Pesoal ida hetan pena disiplinar inatividade ho durasaun tinan rua no pesoal seluk hetan pena disiplinar suspensaun ne’ebé ho durasaun fulan tolu”, esplika Komisáriu ba asuntu disiplina, Agapito da Conceição ba media GMN no Independente liu husi entrevista ne’ebé hala’o iha loron Kuarta-feira, (13 Maiu 2026), iha ninia servisu fatin KFP Matadouro Díli.

Komisaun Funsaun Públika mós kontinua halo diseminasaun atu partilla kona-ba asédiu seksual no pena disiplinar sira ba kargu diresaun, xefia no funsionárius ne’e sai hanesan baze ida hodi haklean koñesimentu sira hodi prevene kaze asédiu seksual no hakarak informa públikus liu-liu ba vítima asédiu seksual sira atu labele tauk hato’o keixa mai iha Komisaun Funsaun Públika, identidade imi-nia seguru atu nune’e pesoal ne’ebé komete bele la’o tuir prosesu legal sira.

Iha fatin hanesan, Komisáriu Agapito da Conceição hateten, wainhira funsionáriu ne’ebé komete kazu no hetan tranferénsia ba instituisaun seluk maibé, nafatin komete kazu asediu seksual ba dala rua, tuir Lei funsionáriu refere bele hetan pena disiplinar demisaun. Nune’e mós kazu ruma ne’ebé akontese maibé laiha keixa KFP laiha kompeténsia atu investiga no foti dezisaun ruma.