Comissão da Função Pública

Categories: Notícias

KFP no MS Koordena Hodi Dudu Kualidade Servisu Saúde

DILI, 14 Maiu 2026 – Komisária Komisaun Funsaun Públika (KFP), Anita Tavares Ribeiro de Jesus, hamutuk ho Diretór Jerál Servisu Koorporativus Ministériu Saúde (MS), Marcelino da Costa do Rosário, reuniaun ho kargus xefias no pontu fokal sira husi nivel nasional to’o munisipal nian hodi halo reajustamentu dadus funsionáriu no fasilidade saúde iha Palásiu das Cinzas, Ministériu Saúde.

Inisiativa ne’e hodi aliña no uniformiza dadus funsionáriu permanente no kontratadu sira iha Munisípiu no Ospitál sira, hodi kumpri mapa pesoál foun husi Ministériu Saúde. Ho objetivu prinsipál mak hodi asegura distribuisaun rekursu umanu ne’ebé kualifikadu iha baze, identifika nesesidade infraestrutura, no hametin koordenasaun estratéjika entre Komisaun Funsaun Públika (KFP) no Ministériu Saúde (MS).

Komisária Anita Tavares dehan katak, servisu tékniku ne’ebé involve kargu xefia no pontu fokál sira husi Munisípiu ne’e importante tebes. Jestaun rekursu umanu tenke la’o planeadu no bazeia ba nesesidade reál hodi foti desizaun ne’ebé di’ak.

“Kordenasaun ne’e sei dudu kualidade servisu saúde nian sai kualifikadu liután hodi dignifika funsionáriu no garante atendimentu ne’ebé dignu ba povu,” Komisária dehan.

Iha fatin hanesan, Diretór Jerál Marcelino da Costa do Rosário hateten, fundamentu tolu (3) ne’ebé sai baze ba avaliasaun forsa de traballu ne’e mak primeiru ezijénsia populasaun hodi responde ba nesesidade povu nian ne’ebé aumenta ba beibeik, segundu dezenvolvimentu sistema atu harii sistema saúde ne’ebé di’ak no sustentável ba oin no ikus mak fundamentu polítika atu uza mata-dalan Estadu nian hodi dezeña jestaun rekursu umanu ne’ebé di’ak.

Marcelino hateten katak metas boot mak oinsá bele mellora prestasaun kuidadu saúde hodi atinji kuidadu saúde universál.

“Ita hakarak ema hotu-hotu bele asesu ba kbi’it saúde ne’ebé adekuada no dignu, atividade ne’e marka pasu estratéjiku ida hodi asegura katak servisu prestasaun saúde iha territóriu laran tomak la’o ho kualidade, efisiente, no di’ak ba dezenvolvimentu nasionál”, nia hatutan.