Comissão da Função Pública

DILI – Komisaun Funsaun Públika (KFP) hamutuk ho Institutu Nasionál Seguransa Sosiál (INSS) foti pasu estratéjiku hodi implementa reforma ba funsionáriu públiku sira ne’ebé kumpri ona idade tinan 65 ba leten. Inísiu tinan 2026 hahú ona aplikasaun Deketu-Lei númeru 7 & 9 ne’ebé vigora ona dezde loron 1 Janeiru 2026.

Tuir Komisáriu Portfóliu ba Assuntu Pensaun no Reforma, Jorge Paiva Araújo esplika, KFP ho INSS asina ona Memorandu de Entendimentu (MoU) hodi fasilita tranzisaun seguransa sosiál nian. Akordu ne’e sai hanesan pontu xave hodi asegura katak funsionáriu sira ne’ebé reforma ona bele simu sira-nia direitu tuir lei haruka. Iha tinan 2026, totál funsionáriu públiku ne’ebé tama ba idade reforma (tinan 65 ba leten) hamutuk 1.985 pessoas husi instituisaun Estadu hot-hotu. Husi totál ne’e, prosesu pagamentu ne’ebé halo ona funsionáriu nain 1.420 ne’ebé asesu ona ba pensaun no sira hahú ona simu fulan-fulan, no iha funsionáriu nain 565 mak seidauk bele asesu ba sira-nia direitu tanba problema administrativu.

Komisáriu Jorge Paiva esplika katak, kazu na’in 565 ne’e akontese tanba ddokumentus la kompletu no dadus balun (hanesan númeru dokumentu) ne’ebé labele lee ka kofunzu. Ba kestaun ne’e, KFP haruka ona lista no dokumentus sira ne’e fila fali ba Rekursu Umanus (RH) iha instituisaun orijen atu kompleta fali dadus sira ne’e, antes submete fila fali ba KFP hodi kontinua prosesa ba INSS.

“Maske dokumentus sira ne’e sei iha hela prosesu laran, funsionáriu sira labele preokupa. Sira sei la lakon sira-nia direitu. Bainhira dokumentu kompletu ona, INSS sei prosesu sira-nia pensaun inklui mós pensaun ne’ebé atrazu sei retroativu,” dehan Jorge Paiva Araújo ba RTTL iha segunda-feira, 30 Marsu 2026.