Comissão da Função Pública

Tersa-feira, 09/07/2024, Ekipa konjunta kompostu husi Komisaun Funsaun Públika, Komisaun Anti Korupsaun, Inspetoria Geral Estadu no Diresaun Jeral Jestaun Patrimóniu Estadu – Ministériu Finansas kontinua hala’o vizita surpreza ba iha Institutu Nasionál Farmásia no Produtu Médiku (INFPM) no Hospital Nasionál Guido Valadares (HNGV) hodi haree no inspesiona direta aimoruk ne’ebé falta no fó impaktu ba iha atendimentu iha HNGV no sentru saúde sira ne’ebé durante ne’e públiku kestiona no sai hanesan fatór determinante ba povu ba saúde ninian.

Ekipa konjunta ne’e, atu haree besik lalaok servisu pedidu ba sosa aimoruk husi rai liur liu husi kompania no ajensia internasional sira ninia apoiu, no husi INFPM ninia esplikasaun katak, stock aimoruk sufisiente maibé em termos de burokrasia mak halo pedidu distribuisaun aimoruk tarde to’o iha HNGV no sentru saúde sira. Nune’e Komisáriu KFP husu atu simplifika burokrasia atu labele fó impaktu ba iha públiku.

Iha parte ida, ekipa inspesiona mós lista prezensa funsionárius públikus hodi haree ba pontualidade servisus tuir tempu atempada.

Hafoin vizitas surpreza ba iha armazen Institutu Nasionál Farmásia no Produtu Médiku (INFPM), ekipa kontinua ba iha Hospital Nasionál Guido Valadares (HNGV) hodi haree direta atendimentu iha ne’ebá liga ho aimoruk ne’ebé la sufisiente hodi fó impaktu ba pasiente.

Komisáriu KFP, asuntu disiplinar, Agapito da Conceição esplika, iha vizita ne’e ekipa identifika iha INFPM check out ba aimoruk sira ne’ebé mak haree iha parte aprovizionamentu no armazen kompania fornese sufisiente to’o fin tinan ne’e no bele kontinua to’o fulan marsu tinan oin. Mezmu públiku kestiona menus aimoruk maibé, ekipa haree no rona esplikasaun sira katak, aimoruk sufisiente atu fó atendimentu ba ita nia povu sira, iha HNGV no sentru saúde sira.

Hanesan diretiva HNGV esplika, iha emerjensia mós iha aimoruk sufisiente no sira mós rezerva aimoruk seluk ne’ebé la iha INFPM, HNGV urjentemente ba sosa hodi uza ba loron rua eh tolu nia laran hodi atende ba iha pasiente ne’ebé presiza.

Ligadu ba iha pessoal saúde ne’ebé la efetivu halo atendimentu ba iha pasiente sira, KFP no ekipa rona esplikasaun no haree ona katak, atendimentu ne’ebé iha la’o normal, haktuir Komisáriu KFP.

Iha parte lokraik ekipa ne’ebé lideradu husi Komisáriu KFP ba asuntu disiplinar hamutuk ho KAK, IJE no DJJPE-MF kontinua vizitas ba iha sentru saúde Bairo Formoza, sentru saúde Vera Cruz hodi kontinua konfirma liután situasaun ligadu atendimentu no stock aimoruk. Alende ne’e ekipa mós rekolla lista prezensa ne’ebé kuaze asina hotu husi pessoal saúde balun durante fulan ida nian.

Finalidade husi vizitas surpreza ne’e sei tur hamutuk hodi halo relatóriu konjunta ida hodi hato’o rekomendasaun sira ba iha ministériu no instituisaun sira ne’ebé vizitas ba, no ba funsionárius ne’ebé la kumpri regras, ekipa sei fó sansaun tuir iregularidade sira ne’ebé komete husi pessoal funsionárius sira, dehan Komisáriu ba asuntu disiplinar, Agapito da Conceição ba jornalista iha terenu.