Comissão da Função Pública

Kargu diresaun xefia nu’udar dirijente importante hamutuk  funsionáriu públiku sira iha Ministériu, ezije atu kontribui no iha inisiativa hodi fó solusaun ba Ministru hodi hatutan polítika Administrasaun Públika ba setór dezenvolvimentu tuir ida-idak nia área kompeténsia hodi hadia/mellora  kualidade prestasaun servisu. Maibé depende ba desizaun no solusaun  ba problema sira ne’ebé akontese iha área Agrikultura, Floresta no Peskas nian.   

Presidente Komisaun Funsaun Públika, Agostinho Letêncio de Deus halo afirmasaun ne’e iha diskursu  serimonia tomada de posse ba kargu diresaun no xefias Diretor Jeral, Diretor Nasional to’o xefe seksaun husi Nasional no Munisípiu  hamutuk nain 180,  kompostu feto nain  31 no mane nain 149.

Autoridade CFP Agostinho Letêncio de Deus esplika, kagru diresaun no xefia nu’udar dirijente maximu iha Ministériu ida asume kargu ás iha orden birokrata atu lori solusaun ba problema ne’ebé mosu iha kada diresaun hodi aprezenta ba Ministru no Sekretariu Estadu hodi deside tuir opsaun ne’ebé aprezenta.  Tendensia Komisaun Funsaun Públika nian ba ekstensaun kargu xefia sira ba de’it fulan neen no la’ós ona tinan rua no la’ós ona selesaun pur méritu ba tinan haat,  ho hanoin ida atu ezije kargu xefia sira halo servisu, kontribui fó solusaun ba Ministru no Sekretariu Estadu  relasiona ho problema sira ne’ebé akontese no la’ós atu lori de’it problema.

Agostinho Letêncio de Deus subliña, kargu diresaun no xefia ne’ebé simu posse ho mandatu fulan neen maibé, depois fulan neen asume kargu laiha progresaun no mudansa ruma, Ministru iha kompetensia atu troka. Tamba ne’e husu ba kargu xefia sira  atu servisu ho responsabilidade, inisitiva no mudansa  iha  servisu fatin durante asume kargu, presiza iha planu kurtu prazu no longu prazu kona-ba progresu ba produtividade produsaun agríkola maka bele produz hodi sustenta aihan ba komunidade no kontribui ba redusaun importasaun aihan husi estranjeirus. Inisitiva no mudansa servisu depende ba kualidade prestasaun servisu no desizaun solusaun ba problema sira ne’ebé akontese  iha área agrikultura, peskas no florestas nian.

Molok remata Prezidente KFP IV mandatu lori Komisaun nia naran agradese ba servisu hamutuk ho  Ministru Agrikkultura Pekuaria Peskas no Florestas (MAPPF) ho esperansa ida katak, ho tomada de posse  ne’e bele lori solusaun ida ba parte produsaun hahán lokal, parte Agrikultura Peskas, Floresta iha Timor Leste.

Entretantu, Ministru Agrikkultura Pekuaria Peskas no Florestas (MAPPF),  Eng. Marcos da Cruz hateten, MAPPF infrenta hela dezafiu oi-oin maibé, vizaun ne’ebé Estadu no Governu fó maka oinsá bele providensia aihan lokal ne’ebé barak, nutritivu, sustentável no orienta ba merkadu baze orientasaun dezenvolvimentu agrikultura ida orgániku.  Atu atinji objetivu ida ne’e, importante maka tenki iha ekipa, koordenasaun servisu ho instituisaun Estadu iha nasional nu munisipal, disiplina, planu prioridade baze ba orsamentu, kapasidade atu organiza ema atu halo servisu, kontrola aktividade servisu no komunikasaun.

Partisipa iha serimónia ne’e kargus diresaun no xefias MAPPF no funsionaárius sira iha salaun MAPPF, Comoro, Díli iha tersa-feira, (09/07/2024).