Comissão da Função Pública

Komisaun Funsaun Públika kontinua hametin no aperfeisoa kapasidade funsionárius públikus ba formasaun durante semana ida ligadu ba Administrasaun Públika nian iha nivel interna.

Komisáriu KFP, ba porfóliu pensaun no reforma, Jorge Paiva Araújo ensera formasaun interna kona-ba Jestaun Administrasaun Públika ne’ebé realiza durante loron lima (1-5 Dezembru 2025), iha salaun Sentru Juvenil Taibessi-Díli, iha Sexta-feira, (05/12/2025).

Iha enseramentu formasaun interna ne’e Komisáriu Jorge Paiva Araújo enkoraja formandu sira atu valoriza ho pasiensia hodi hasa’e koñesimentu hodi lori ba aplika iha servisu fatin lor-loron nian.

Komisáriu sita tan matenek-nain husi Francês ida ho anekdota “conhecimento sem a prática é nulo.” Katak, koñesimentu ne’ebé ita hetan kuandu la tau iha prátika ne’e sei la iha valor. Materia ne’ebé hetan durante ne’e atu aumenta koñesimentu no dezenvolvimentu ba kareira, liliu ba mákina Estadu. kona-ba governasaun digital atu reduz papeis no poupansa, ne’e esensial tebes, no husu ba funsionáriu sira digitalizasuan governu ne’e hodi lori Timor-Leste ba administrasaun públika ne’ebé modernu, transparente, no responsavel ba povu nia nesesidade tanba agora Timor-Leste tama ba ASEAN, tenke hatudu katak hanesan servidor estadu Timor-Leste ne’e iha kapasidade hodi bele kompete.

Formasaun ne’e mai husi diresaun sira iha SKFP laran, ho total partisipantes hamutuk nain 19, feto nain 9 no mane nain 10.