Comissão da Função Pública

Komisaun Funsaun Públika (KFP) no Institutu Nasional Seguransa Sosial (INSS) nota entendimentu hodi kontinua fasilita servisu entre instituisaun rua ne’e ba prosesa seguransa sosial nian ho la’is liután liu husi sistema SIGAPNET no sistema INSS nian.

Objetivu ne’e iha âmbitu implementasaun ba eventualidades velhice, invalidez no prestasoens por morte ba funsionárius públikus iha administrasaun públika nian iha âmbitu ba Rejime Jurídiku Seguransa Sosial.

Prezidente INSS, Arlindo Pinto  dehan, asinatura nota entendimentu ida ne’e atu fasilita servisu ida ne’ebé la’is ba rejime kontribuitivu ne’ebe mak durante ne’e INSS halo atemndimentu ba setor privadu no setor públiku sira, liu-liu ba atendimentu ba trabalhador sira ne’ebe mak iha setor públiku. Bainhira funsionariu públiku ida tama ona ba pensaun no hetan prestasaun servisu ka reforma ona ne’e liga fali sistema KFP, atu nune’e ba oin halo atendimentu ho lalais no di’ak liután.

Iha fatin hanesan Prezidente KFP, Agostinho Letêncio de Deus reafirma, asinatura Memorandum de Entendimentu (MoU) ne’e ho INSS (Institutu Nasionál Seguransa Sosiál) atu fasilita funsionáriu sira ne’ebé tama reforma. Objetivu mak atu hetan hetan dokumentus lais, wainhira funsionáriu sira ne’ebé reforma ona labele la’o ba mai trata dokumentus, sira bele asesu liuhusi sistema online, servisu la’o lais no di’ak liu tan hodi partilha dadus entre KFP no INSS atu servisu reforma nian sai efisiente.

Entretantu, Komisáriu Jorge Paiva Araújo hatutan kona-ba planu IX Governu nian atu implementa sistema reforma ida ne’e sai nu’udar “governasaun dijitalizasaun” atu ajuda ema ne’ebé tama reforma. Tanba funsionáriu ne’ebé reforma la sente kontente (goza) ho reforma, tanba sira-nia dokumentus la kompletu, obrigatoriamente sira tenke halai ba mai atu trata dokumentus, maski sira simu vensimentu (saláriu) ki’ik kada fulan. Nune’e iha VIII Governu halo ona Decreto-Lei n.º 7/2024, ne’ebé aprova kona-ba reforma obrigatória, no Governu Atual (IX) aprova tan Decreto-Lei ida iha Abríl atu KFP servisu hamutuk ho INSS kona-ba sistema dijitalizasaun ne’e. Ho objetivu prinsipal ida mak atu fasilita ema ne’ebé kontribui ona ba Estadu para bainhira sira deskansa no goza sira-nia reforma, labele hetan difíkuldade iha prosesu dokumentál hodi hetan direitu ne’ebé Estadu fó.

Komisáriu sita, reforma obrigatória mak iha idade 65 anos. Maibé, se instituisaun presiza nafatin funsionáriu ne’e, bele halo kontratasaun fali. Lei ne’e mós la taka dalan ba sira ne’ebé atu reforma ho idade 60 anos. Se ema ne’e hakarak reforma ho 60 anos, bele halo pedidu ba KFP no KFP sei entrega ba INSS atu trata seguransa sosiál.