Comissão da Função Pública

DILI – Komisaun Funsaun Públika (KFP) foti pozisaun maka’as hodi klarak katak la iha regras ne’ebé bandu funsionária sira ho kondisaun grávida ka isin-rua atu asina kontratu servisu iha Administrasaun Públika. KFP husu ba Instituisaun no Ministériu sira hotu atu la bele kria regras rasik ne’ebé viola direitu fundamentál ne’e.

Komisária KFP, Anita Tavares Ribeiro de Jesus, iha ninia intervensaun foin lalais ne’e (10/03/2026), afirma katak tuir regras Funsaun Públika nian, kondisaun isin-rua la’ós kriteria ida hodi impede ema ida atu hetan kontratu.

“Iha Komisaun Funsaun Públika la define regras kona-ba funsionária ida nia kondisaun grávida ka isin-rua ona labele kontratu. KFP haree ema hot-hotu iha direitu hanesan,” tenik Komisária Anita.

Nia husu ba lideransa iha Ministériu no Instituisaun Estadu sira atu la bele foti desizaun ne’ebé “fora husi regras”, tanba kestaun isin-rua nian seidauk iha regulamentu ruma ne’ebé bandu ema atu servisu.

Maske nune’e, Komisária ne’e klarak katak iha espsesaun ba instituisaun seguransa no defeza nian, hanesan F-FDTL no PNTL. Iha ne’ebá, regra sira rígidu liután tanba envolve ezersísiu fíziku maka’as ne’ebé bele fó risku ba saúde inan no bebé nian. Tan ne’e, ba setór espesífiku sira ne’e, isin-rua bele sai impedimentu hodi proteje fali seguransa pesoál nian.

Alende kestaun grávida, KFP mós fó sai progresu konaba Dekretu Lei nú. 3/2026 ne’ebé regula Rejime Termu Sertu. Iha pontu balun ne’ebé importante mak KFP hamutuk ho Ministériu Finansas besik ona atu finalize prosesu ajustamentu hodi selu funsionáriu sira-nia saláriu ba fulan ida ne’e no Instituisaun hamutuk 100 resin mak halo ona ajustamentu dadus. KFP sei hein hela instituisaun restu sira hodi kompleta sira-nia dadus antes haruka ba Ministériu Finansas, dehan Komisária KFP.

Komisária KFP, Anita Tavares Ribeiro de Jesus, espera katak la iha tan diskriminasaun ba feto sira ne’ebé isin-rua iha fatin servisu, no prosesu administrativu ba kontratu foun sira bele la’o tuir tempu ne’ebé determina ona.