Comissão da Função Pública

Komisaun Funsaun Públika lansa pre-post test digital iha munisípiu Aileu hodi hahú diseminasaun legislasaun, regras no prosedimentu sira, inklui informasaun integradu husi instituisaun integradu sira seluk hodi partilla ba kargus diresaun no xefias munisipais hodi inteira ho di’ak hodi bele serví di’ak liutan ba oin.

Ekipa integradu ne’e lidera husi Prezidente Komisaun Funsaun Públika, Agostinho Letêncio de Deus kompostu husi MAE, MNEK, Ministériu Finansas, Sekretaria Estadu Igualdade, Inspetoria Jeral Estadu, PDHJ, INSS, no CRAM hodi lansa ofisialmente atividade diseminasaun no lansa mós digital test (pre test no post test) iha Munisípiu Aileu, ne’ebé hetan akompañamentu husi Autodidade Sekretária Asuntu Sosial Munisípiu Aileu.

Iha diskursu abertura ne’e Prezidente KFP, Agostinho Letêncio de Deus hato’o katak, abertura programa diseminasaun ne’e nu’udar atividade dahuluk husi KFP iha IX Governu Konstitusional hala’o ba funsionáriu sira. Atividade ne’e hala’o husi mandatu anterior ne’ebé kobre ona ba postu administrativus, maibé husi IV mandatu ninia sei foku de’it ba dirijentes nivel munisipal sira atu bele iha koñesimentu hodi partilla ba funsionárius, tanba kestoens administrativas ida ne’ebé prinsipal tebes mak dirijentes sira hafoin funsionárius.

Iha mandatu ba dahaat nian Komisaun sei hanoin iha futuru formasaun sai asuntu inportante no prinsipal iha kareira funsionárius sira nian, ne’e tenke sai sasukat aas liu ba kareira funsionárius públikus iha Administrasaun Públika. Tanba Komisaun mós hala’o ona vizitas ba nasaun dezenvolvidu hanesan Singapura ne’ebé sai hanesan referensia di’ak ba Komisaun atu bele fó prioridade ba iha formasaun obrigatoriamente 100 oras kada tinan enkuantu Timor iha 40 oras de’it ba kada tinan, maibé KFP komprometidu atu implementa polítika formasaun ida ne’e nu’udar asuntu prinsipal ba iha dezenvolvimentu kareira, esplika Prezidente KFP iha abertura diseminasaun iha segunda feira, (13/05/2024).

Iha fatin hanesan Prezidente Interina ba Autoridade Munisipiu Aileu, Vitoria Mesquita do Rego hato’o katak, hodi Autoridade Munisipiu Aileu nia naran apresia ba inisiativa ida ne’e ne’ebé eskolla Munisipiu Aileu nu’udar fatin ba dala uluk ba lansamentu programa diseminasaun iha nivel munisipal ninian ho objetivu husi sorumutu ida ne’e hodi hetan informasaun ligadu ho regulamentu sira ne’ebé hatur nanis husi konstituisaun RDTL ho lei, dekretu-lei no diploma ministerial sira ne’ebé ezije kargus diresaun no xefia sira hodi integra koñesimentu iha asaun no desizaun sira ne’ebé la perturba direitu sira liga ho regulamentu sira. Tanba ne’e autoridade husi ba kargus diresaun no xefia sira atu partisipa ho màximu hodi rona no aplika iha servisu ho profesionalizmu atendimentu ba iha pùbliku.

Nune’e Diretur-Jerál Polítika Dezenvolvimentu Desentralizasaun, António Augostu Guterres ne’ebé reprezenta MAE hato’o katak, objetivu diseminasaun ne’e atu haklean koñesimentu dirijente sira tanba, maioria foun nune’e bele koñese regulamentu sira no integra ho sistema liu-liu implementasaun ba dekretu-lei nù.84/2023 no dekretu-lei sira seluk.