Comissão da Função Pública

Segunda-feira, 13 Maiu 2024 – Komisáriu Komisaun Funsaun Públika portefóliu ba asuntu Pensaun no Reforma, Fausto Freitas da Silva halo abertura ba iha formasaun ho tema “Hasa’e Kualidade Servisu no Kna’ar Funsionáriu Públiku” iha Salaun CCT Postu Adminitrativu Railaco, Munisípiu Ermera, ba funsionárius públikus Ministériu Justisa hamutuk na’in 25 (ruanulu-resin-lima).

Objetivu husi formasaun ne’e atu hadi’ak kualidade no presta servisu ida profesionál iha servisu fatin ba funsionáriu permanente sira mai husi diresaun sira iha Ministériu Justisa no inklui funsionáriu sira ne’ebé husi munisípiu.

Iha abertura formasaun ida ne’e Komisáriu Fausto Freitas da Silva hatete, formasaun ne’e la’ós atu garante finalidade ba efeitu sira liga ho dezenvolvimentu kareira funsionáriu ida-idak nian, maibé importante liu atu buka hatene no inteira didi’ak ho matéria sira mak hato’o husi formadór oi-oin hodi kontribui ba dezenvolvimentu kareira no mós melloramentu iha efisiensia, efikasia no responsabilidade aas liutan iha prestasaun servisu.

Iha tempu hanesan Ministru Justisa, Sérgio de Jesus Fernandes da Costa Hornai fó mensajen ba formandu sira katak, durante oras oras 40 (haatnulu) iha tinan ida ne’e aproveita didi’ak hodi eleva koñesimentu ne’ebé formador sira fó tuir nia abilidade koñesimentu hodi partilla ba formandu sira atu bele tulun no orienta iha prátika di’ak sira ba servisu lor-loron nian ho prestasaun ida ho kualidade no lalais ba públiku ho Governasaun ida besik liu ba iha povu.

Formasaun  abertura ne’e ofisialmente loke husi Ministru Justisa, akompaña husi Komisariu KFP no Administradora Postu Railaco no hetan partisipasaun husi formador sira INAP, Terras no Propriedade, Komandante Eskuarda Railaco no Formador sira seluk.