Comissão da Função Pública

Prezidente Komisaun Funsaun Públika, Agostinho Letêncio de Deus ho komisária portefóliu ba dezenvolvimentu kareira espesiais, Anita Tavares Ribeiro de Jesus enkontru ho Ministra Saúde, Élia dos Reis Amaral hodi haree hamutuk ba setór saúde ninian liliu ligadu ba iha rekursu umanus ninian no kareira espesiais.

Iha enkontru ne’e Prezidente KFP, Agostinho Letêncio de Deus esplika kona-ba despaisu ne’ebé Primeiru-Ministru fó sai liu husi Konsellu Ministru ba ekipa traballu entre KFP ho Ministériu Finansas. Ho hanoin ida ne’e KFP hamutuk ho Ministériu Finansas inisia ona diskusaun reforma ein jeral ligadu ba iha kareira sira, husi ne’e haree ba iha reajustamentu lubun ida liliu salarial nian, hanesan ba profisionais saúde, edukasaun – foku ba profesores, oinsá atu buka diskute ba iha rejime espesial sira ne’e.

Nune’e Ministra Saúde, Élia dos Reis hein katak, esforsu ne’ebé mak KFP hanoin atu halo reforma ba instituisaun públiku sira, ita bele haree no ajusta ba iha profisional saúde ne’e hanoin di’ak. Tékniku presiza integra didiak oinsá atu hadia servisu saúde ho di’ak.

 Ministra Saúde ne’e dehan, tinan barak ona profisionais saúde liliu espesialista sira mantein ho saláriu ne’ebé daudaun ne’e eziste, husi ida ne’e ita la’lós atu haree de’it ba salariu maibé haree mós ba produtividade baze ba espesialidade ida-idak ninian hodi bele presta servisu ho kualidade ba povu.

Enkontru ne’e  hala’o iha segunda-feira, (24/03/2025), iha  salaun Minitra Saúde iha Palacio das Cinzas, Caicoli.