Comissão da Função Pública

Ekipa Konjuta Kuadrilateral kompostu husi Komisaun Funsaun Públika (KFP), Komisaun Anti Korupsaun (KAK), Inspesaun Jeral Estadu (IGE) no Diresaun Jeral Jestaun Patrimóniu Estadu – Ministériu Finansas iha kinta-feira, (27/03/2025) reuniaun ho kargu diresaun xefia no funsionáriu Ministériu Agrikultura, Pekuaria, Peskas no Floresta (MAPPF) halo konfirmasaun faktus ba dirijentes no funsionárius ne’ebé naran tama iha lista durante vizita surpreza ekipa konjunta nian ba MAPPF iha fulan Maiu no Juñu tinan 2024.

Komisáriu ba asuntu disiplinar, Agapito da Conceição iha abertura enkontru esplika, importansia husi enkontru ne’e atu halo konfirmasaun ba faktus ne’ebé ekipa konjunta identifika durante vizita surpreza hanesan funsionáriu balun la asina lista prezensa kuaze semana  tomak konsidera faillansu ida ne’ebé servidor Estadu komete iha sistema administrasaun públika.

Atividade vizita surpreza ne’ebé ekipa konjunta kuadrilateral hala’o ba iha instituisaun Estadu ba liñas Ministeriais iha Nasional no Munisípiu sira bazeia ba orientasaun husi Primeiru-Ministru atu oinsá asegura no hadia sistema administrasaun públika iha Timor-Leste atu kontinua halo melloramentu ba iha atendimentu ba públiku ho efisiensia no efikasia, dehan Komisáriu Agapito da Conceição.

Iha tempu hanesan Komisáriu Adjuntu Prevensaun no Sensibilizasaun, Rosário Salsinha Araújo aprezenta pontu iregularidade ne’ebé identifika durante vizita surpreza, iha momentu ne’ebá maka “funsionáriu balun la asina lista prezensa, servisu rekursu umanus la integra prosesu atu trata direitu lisensa maternidade ba funsionáriu, laiha espasu adekuadu ba funsionáriu halo servisu, menus fasilidade hanesan komputador, laiha lista prezensa ba asesor sira no ladun iha pontualidade servisu. Haree ba kestaun ne’e lista prezensa manual no eletrónika oras la hanesan, problema direitu osan konsumu ba funsionáriu karantina la simu kompletu, no espasu ba fatin servisu no laiha armazenamentu ba sasán ne’ebé prende,  la dun iha manutensaun ba kareta Estadu hodi difikulta ba servisu, kargu xefia balun kontinua lori kareta ba uma maske simu ona subsidiu transporte.

Enkuantu kargu xefia kada diresaun iha Ministériu Agrikultura, Pekuaria, Peskas no Floresta rekoñese pontu iregularidade ne’ebé ekipa konjunta identifika durante vizita surpreza. Maske nune’e iha asuntu balun konsege rezolve ona no kontinua iha komitmentu atu buka solusaun ba problema sira seluk atu  servisu MAPPF bele la’o di’ak liu husi apoiu husi ekipa konjunta nian.

Komisáriu Agapito da Conceição no Komisáriu Adjuntu  Rosário Salsinha Araújo lori ekipa konjunta Kuadrilateral esplika katak, vizita surpreza ne’ebé halo iha instituisaun Estadu iha nasional no munisípiu la’ós atu buka de’it faillansu sira ne’ebé akontese, maibé identifika oinsá atu hadia no mellora administrasaun públika iha prosesu atendimentu ba públiku ida di’ak ba beibeik. No husu ba kargu diresaun xefia sira hahú husi diretur jeral to’o xefe seksaun atu hatudu vontade no disiplina servisu halo jestaun ne’ebé di’ak no responsabilidade ba melloramentu atendimentu ba públiku.