Comissão da Função Pública

Komisaun Funsaun Públika (KFP) hamutuk ho Ministériu Finansas (MF) konsege finaliza ona prosesu ajustamentu salariál ba funsionáriu kontratadu termu sertu hamutuk na’in 20.300 (rihun ruanulu atus tolu) husi instituisaun Estadu nian. Husi númeru ne’e, ministériu balun finaliza ona prosesu ajustamentu no funsionáriu sira simu ona saláriu, enkuantu na’in 13.000 (rihun sanulu-resin-tolu) sei hein hela tanba presiza halo reajustamentu ba tabela orsamentu no kontratu foun bazeia ba Dekretu-Lei Nu. 3/2026 kona-ba Rejime Termu Sertu.

Prezidente KFP, Agostinho Letêncio de Deus, hato’o informasaun ne’e wainhira halo entrevista ho jornalista GMN TV hodi hatan ba pergunta kona-ba atrasu iha prosesu pagamentu saláriu ba funsionáriu kontratadu sira.

Prezidente Agostinho Letêncio de Deus esplika katak saláriu ba funsionáriu kontratu termu sertu depende ba ezijénsia serbisu husi liña ministériu sira nian. Hafoin Dekretu-Lei Nu. 3/2026 aprova, iha prazu loron 30 nia laran atu hala’o prosesu reajustamentu ba kontratu no saláriu sira bazeia ba tabela foun ne’ebé deskreve iha dekretu-lei ne’e rasik.

“Hahú fulan-Marsu to’o agora, ekipa téknika Komisaun reajusta no prosesa ona instituisaun hamutuk 97 husi totál instituisaun Estadu 111, inklui ministériu sira. Totál funsionáriu ne’ebé asina ona kontratu termu sertu iha tinan 2026 hamutuk na’in 20.300 no sira simu ona saláriu hahú husi Marsu mai oin,” dehan Prezidente KFP, Agostinho Letêncio de Deus.

Funsionáriu na’in 13.000 ne’ebé seidauk simu saláriu, Prezidente KFP esklarese katak sira mai husi instituisaun balun, inklui Ministériu Agrikultura no Peska (MAP). Atrazu ne’e akontese tanba, seidauk aprezenta dokumentu kontratu no tabela salariál foun, distribuisaun funsionáriu ne’ebé barak iha nível Nasionál, Munisípiu, Postu Administrativu, to’o Suku sira, ne’ebé presiza tempu hodi organiza dokumentasaun.

Dokumentu sira ne’ebé Komisaun analiza mak dokumentu ne’ebé rekursus ukanus husi ministériu ida-idak rekolla. Prosesu ne’e envolve hodi analiza ba nível saláriu ida-idak nian, ba sira ne’ebé asina kontratu foun. Ekipa ministériu aprezenta ba KFP hodi analiza hamutuk ho orsamentu saláriu vensimentu 2026 no KFP haruka ba Ministériu Finansas hodi prosesa pagamentu. Parte Komisaun Funsaun Públika kontinua hein hela dadus husi instituisaun no ministériu sira ne’ebé seidauk hato’o, atu bele aselera prosesu pagamentu ba Ministériu Finansas, dehan Autoridade Funsaun Públika.