Comissão da Função Pública

Díli, 23 Fevereiru 2026, Prezidente Interina Komisaun Funsaun Públika (KFP), Anita Tavares Ribeiro de Jesus no Sekretária Ezekutiva Komisaun Funsaun Públika Maria da Costa Oliveira, no pontu fokal sira partisipa reuniaun koordenasaun entre liñas ministeriais kona-ba preparativus Prezidensia Konsellu Timor-Leste ba ASEAN nian iha tinan 2026, ne’ebé realiza iha salaun Ministériu Finansas-Aitarak laran.

Reuniaun ne’ebé lideradu husi Primeiru Ministru, Kay Rala Xanana Gusmão iha ninia diskursu deklara ho laran-metin katak tinan 2026 sei sai “livru foun” iha istória Timor-Leste nian. Nasaun ne’ebé uluk moris iha konflitu laran, agora prontu ona atu lidera rejiaun Sudeste Aziátiku liuhosi Prezidénsia Konsellu ASEAN 2026.

Primeiru Ministru Kay Rala Xanana Gusmão subliña katak hafoin liu tiha faze konstrusaun Estadu, agora Timor-Leste hakat ba faze konsolidasaun hodi lidera ASEAN. Ida-ne’e hatudu kbi’it institusionál nasaun nian iha mundu. Entretantu adezaun ba ASEAN la’ós de’it kestaun polítika, maibé sei lori kresimentu ekonómiku hanesan investimentu foun no kampu servisu barak liután, nune’e bele asesu boot ba kualidade edukasaun rejionál no melloria iha sistema saúde no serbisu públiku hodi satisfás nesesidade populasaun nian.

Primeiru Ministru mós fó hanoin katak iha tinan 2029, Timor-Leste sei lidera reuniaun to’o Simeira ASEAN bo’ot ne’ebé nasaun ne’e sei organiza. Atu susesu mak preparasaun tenke hahú agora liuhosi Sekretariadu Nasionál ASEAN no Komité sira.

Primeiru Ministru hatete katak kna’ar ne’ebé Timor-Leste simu la’ós de’it ba festa simeira nian, maibé parte hosi prosesu konstitusionál hodi transforma ekonomia Nasaun nian to’o tinan 2050, hodi garante futuru ne’ebé naroman ba jerasaun foun.

Alende ne’e iha mós aprezentasaun kona-ba vizaun Geral, Matriz ba pozisaun nasional Timor-Leste (TLNPM), Pontus atual ba identifikasaun, lakunas, kronograma ba passu sira tuir mai no faktores kritikus ba susessu 2026 ne’ebé mak Primeiru Ministru aprova iha faze aprezentasaun.

Partisipante sira mai husi membru governu, instituisaun autónoma direta no indireta sira.