Comissão da Função Pública

Tersa-feira, 06/01/2026 – Prezidente no Komisárius Komisaun Funsaun Públika (KFP) hala’o enkontru ho Embaixadora Timor-Leste ba Brazíl, Maria Ângela Carrascalão, hodi diskute planu kooperasaun ba iha formasaun Lian Portugés ba funsionáriu públiku sira iha futuru.

Prezidente KFP, Agostinho Letêncio de Deus, hateten katak diskusaun ne’e sei nu’udar diskusaun preliminár. Maski seidauk iha modalidade ne’ebé fiksa ba formasaun ne’e, diskusaun ne’e importante nu’udar pasu inisiál hodi nune’e iha tinan oin bele identifika ona modalidade ba implementasaun kursu Lian Portugés no Lian Inglés ba funsionáriu sira iha administrasaun públika.

“Aproveita vizita Embaixadora Maria Ângela Carrascalão nian ne’e, ami KFP hameno hela atu bele fasilita kontaktu ho instituisaun sira iha Brazíl ne’ebé iha posibilidade atu koopera iha futuru, liuliu iha asuntu formasaun Lian Portugés,” dehan Prezidente KFP, Agostinho Letêncio de Deus.

Planu koperasaun ho Brazíl ne’e iha objetivu atu responde ba dezafiu funsionáriu sira iha lian portugés ba formasaun, promove servisu hamutuk ho KFP ba instituisaun sira iha Brazíl ne’ebé servisu iha área formasaun nian.

Iha fatin hanesan, Embaixadora Maria Ângela Carrascalão esplika katak nia sei hametin relasaun profunda entre Timor-Leste ho Brazíl hodi kontinua apoia formasaun Lian Portugés ba funsionárius iha administrasaun públika. Dezenvolvimentu Lian Portugés ba jerasaun foun ne’e importante tebes, no Brazíl iha vontade boot atu ajuda Timoroan sira domina lian ne’e.

Embaixadora mós haktuir katak nia vizita mai KFP ne’e hodi simu orientasaun husi Prezidente no Komisáriu sira, konsidera mós nia karreira nu’udar dosente iha UNTL ne’ebé tama ona iha lista reforma obrigatória iha tinan ne’e, no oinsá, wainhira retóma servisu buka atu kontinua kontribui iha área edukasaun nian hanesan dosente.