Comissão da Função Pública

Díli, 24 Fevereiru 2026, Prezidente Interina Komisaun Funsaun Públika (KFP), Anita Tavares Ribeiro de Jesus no Sekretária Ezekutiva Komisaun Funsaun Públika Maria da Costa Oliveira, partisipa workshop interministerial hodi partilla Vizaun ASEAN 2045, melloramentu ba mekanizmu koordenasaun iha Komunidade ASEAN Sosiu Kultural (ASCC), nomeasaun SOCA Leader no alternate sira, aprezenta mós dezafiu sira no oportunidade sira, ne’ebé mak hala’o iha salaun Ministériu Finansas – Aitarak laran.

Iha abertura ne’e Vise-Primeiru-Ministru (VPM) no Ministru Koordenadór ba Asuntus Sosiáis no Ministru ba Dezenvolvimentu Rural no Habilitasaun Komunitária, Mariano Assanami Sabino Lopes, lidera reuniaun koordenasaun ho pilar sosio-kulturál hamutuk ho liñas ministérial kona-ba papel importante, hodi prepara Timor-Leste ba prezidénsia ASEAN ba tinan 2029.

Vise-Primeiru-Ministru mós subliña katak adezaun ne’e ezije instituisaun hotu atu haforsa a’an no hasa’e kualidade tuir padraun rejionál.

Vise-Primeiru-Ministru (VPM) no Ministru Koordenadór ba Asuntus Sosiáis no Ministru ba Dezenvolvimentu Rural no Habilitasaun Komunitária, Mariano Assanami Sabino Lopes, hato’o iha abertura ne’e katak preparasaun entre-Ministeriál, Ministériu koordenador hanesan koordena mekanizmu komunikasaun, maibé ministériu hotu hanesan (Saúde, Edukasaun, Kultura, nst.) iha papél xave hodi prepara a’an ba enkontru nível ministériu nian ne’ebé sei akontese iha tinan 2027 no 2028, antes simeira boot iha 2029.

Vise PM mós fó hanoin katak, kualidade no kompeténsia hanesan Saúde no Ensinu Superiór tenke ajusta a’an ba kurríkulum no kritéria ASEAN, ne’ebé Timor-Leste tama ba ASEAN la’ós hanesan nasaun “inferiór”, Timor-Leste iha dignidade “eransa” ne’ebé furak hosi esperiénsia paz, rekonsiliasaun, no rezolusaun fronteira ne’ebé bele sai lisaun importante ba nasaun sira seluk iha Sudeste Aziátiku.

Nune’e iha biban hanesan, tékniku Sekretáriadu Nasional ASEAN halo mós aprezentasaun kona-ba estrutura organizasaun ASEAN ho ninia mekanizmu sira, responsabilidades sektoriais no regras ASEAN iha nivel koordenasaun nian husi nivel Konsellu, lideransa, senior, to’o nivel tékniku sira, atu inteira substansia dokumentu sira iha nivel ASEAN nian iha reuniaun sira.

Partisipante mai husi membru governu husi instituisaun save 15 hanesan MDRHC, MAE, MSSI, Ministériu Saúde, Ministériu Interior, MJDAK, Ministériu Turizmu no Ambiente, Ministériu Edukasaun, MESSC, Prezidensia Konsellu Ministrus, SECOMS, SEAC, SEI, SEPC, SEFOPE, no KFP.