Comissão da Função Pública

Sekretariadu Komisaun Funsaun Públika servisu hamutuk  Sekretariadu Parlamentu Nasional, realiza teste promosaun dahuluk nian ba rejime espesial ba funsionáriu parlamentar nian ba ema nain 5 kompostu husi feto nain tolu no mane nain rua iha área Tékniku Superior Parlamentar Prinsipal no área Tékniku Profisional Parlamentar Koordenador, iha (15/12/2022), iha salaun Aikurus Binani Matadouro, Díli.

Kandidatu nain lima ne’ebé kompete iha promosaun rejime espesial parlamentu nasionál nian maka Manuel Chardus Barreto Tékniku Superior Parlamentar Prinsipal, Ligia Maria Lobato, Augusta Marques, Hernai de Orleans, no Izilda da Silva Pereira hanesan Tékniku Professional Parlamentar Koordenador (TPPC).

Komisaria Komisaun Funsaun Públika, Maria de Jesus Sarmento iha diskursu abertura promosaun hateten, komisaun senti onradu no kontenti tanba bele hala’o promosaun ba rejime espesial dala uluk husi orgaun soberanu Parlamentu Nasionál utiliza sistema eletrónika. Tanba ne’e husu ba kandidatu sira atu iha boa vontade no pasensia hodi fó resposta ba perguntas sira ne’ebé iha atu bele hetan rezultadu ne’ebé di’ak.

Entretantu Sektráriu Jeral adjuntu Parlamentu Nasionál ne’ebé hanesan Prezidente Juri, João Rui Amaral husu ba kandidatu sira atu kompete no hatudu kapasidade matenek liu husi sistema elektrónika ba perguntas sira ne’ebé maioria liga ba servisu lor-loron, maibé rezultadu ne’ebé di’ak depende ba kapasidade husi kandidatu ida-idak nian.

Programa Promosaun rejime espesial husi Parlamentu Nasionál hahú ho simulasaun husi ekipa téknika kona-ba utiliza sistema eletrónika konta ho partisipasaun husi Sekretaria Ezekutiva Komisaun Funsaun Públika, Maria da Costa Oliveira,  ekipa juri no ekipa téknika husi Parlamentu Nasionál no Komisaun Funsaun Públika.