Comissão da Função Pública

Kinta feira, 15-12-2022, Komissaun Funsaun Públika liu husi Gabinete Inspesaun no Auditoria Minisériu Saúde no GIA-KFP hala’o enkontru trimestral ikus ba Inspetores no Auditores Funsaun Públika ho tema Avaliasaun ba Servisu Inspesaun no Auditoria iha Instituisaun Públika sira iha Timor-Leste.

Objetivu husi enkontru ida ne’e realiza regulamentu kada trimestre ho objektivu atu reuni Auditores no inspetores sira husi instituisaun públika sira hotu hodi bele hare’e ba servisusira no identifika dezafiu sira ne’ebé mak hasoru iha servisu sira la’o ho efisienteno efikáz liu tan.

Iha Prezidente Interinu KFP, Komisáriu Fausto Freitas da Silva iha ninia diskursu hateten, enkontru ida ne’e nu’udar prosesu ida atu hatene alkansu sira ne’ebé ita atinji ona tuir expetativa no planu servisu sira ne’ebé iha ona tuir polítika no kompromisu servisu ne’ebé ita define tiha ona.

Iha parte seluk, servisu GIA ninia alende halo fisklizasaun, assegura kumprimentu ba lei no regulamentu sira, halo prevensaun no fornese solusaun ba irregularidade ne’ebé identifika hodi bele mellora servisu sira iha Funsaun Públika.

Iha tempu hanesan Insptor Jeral Estadu, Francisco de Carvalho mós sita kona-ba inspetoria no auditoria tenke tuir ida-idak ninia área koñesimentu iha setór sira, buka hatene liu tan kazus sira levantadas iha públiku hodi buka rezolve, hanesan saúde nian liga ho aimoruk no kestaun seluk ne’ebé mak sai nu’udar problema komum inklui agrikultura.

Enkontru ne’e halo aprezentasaun husi Inspetor Saúde nian kona-ba sira nia servisu inspesaun ba setór saúde nian, aprezenta kona-ba matadalan ne’ebé saúde uza hodi halo inspesaun iha setór saúde.

No iha forum diskusaun ne’e sujere mós ba inspetoria no auditoria atu haree ba servisu kazus levantadas komum sira hodi bele buka solusiona, buka atu halo armonizasaun ba SOP hodi bele implementa iha setór hotu, rejime jurídiku ida ba Inspetoria no Auditoria no rekomendasaun sira relevantes.

Iha enseramentu enkontru ne’e Komisáriu salienta katak, servisu inspesaun no auditoria ne’e importante teb-tebes hodi asegura servisu sira ne’ebé kada instituisaun hala’o, tuir lei no regulamentu sira ne’ebé mak vijente, liu-liu hodi asegura kumprimentu ba lei no regulamentu sira ne’ebé regula servisu ne’ebé eziste iha estrutura Administrasaun Públika hanesan jestaun ba Rekursus Humanus, jestaun finanseira no regula jestaun patrimonial iha setór públiku hot-hotu. Tanba ne’e ita nafatin esforsu hodi buka fó solusaun ba kestaun sira hotu ne’ebé ita levanta iha enkontru sira ne’ebé ita realiza.

Nune’e Komisáriu alerta nafatin ba Inspetor no Auditor sira hotu atu ezerse sira nia funsaun ho professional, imparsial, hadook-an husi hahalok konflitu interesse sira, buka hatene didiak servisu inspesaun no auditoria ninian tuir lei no regulamentu sira ne’ebé mak iha, hodi nune’e bele hala’o servisu ho efisiente no efikaz liu tan.