Comissão da Função Pública

Komisaun Funsaun Públika preokupa ba lista nomeasaun Funsionárius nain tolu nulu ne’ebé maka lá prenxe grau mínimu ka la tuir rekezitus Estatutu Funsaun Públika nian, preokupasaun ne’e hato’o husi Prezidente Komisaun Funsaun Públika Faustino Cardoso Gomes iha enkontru ho Prezidente Autoriedade Protesaun Sivil Ismael Babo ho Asesor Legal Koronel José Alves iha sala de reunioens Komisaun Funsaun Públika, iha kuarta-feira, 31 fulan Agostu relasiona ho nomeasaun ba kargus no Xefia iha Instituisaun ne’e.

Tuir Prezidente atu asume kargu Diretor Nasional, tenke grau minimu C no asume Xefi Departamentu grau mínimu D tanba ne’e la tuir Dekretu Lei númeru 11/2022, infelizmente Autoriedade Protesaun Sivili kontinia manten buat ne’ebé la eziste ona iha Dekretu ne’ebé altera tiha ona.

Tanba ne’e Komisaun lá rejista no la prosede iha prosesu remuneratória, adianta Prezidente Faustino Cardoso Gomes.

Relasiona ho preokupasaun ne’e Prezidente Autoridade Protesaun Sivil, Ismail Babo, rekoñese no hateten, maske Komisaun prepara ona draft maibé, Protesaun Sivil halo selesaun ba funsionáriu ka fó oportunidade ba sira bazeia ba nesesidade Protesaun Sivil.

Segundu Prezidente Autoriedade Protesaun Sivil durante halo selesaun ne’e tuir Funsionáriu sira nia abilitasaun literária, esperiênsia de servisu, avaliasaun Dezempeñu maske grau kiik, tanba Servisu Protesaun Sivil Diferente liu du ke funsaun sira seluk.

Komisáriu António Freitas mós rekomenda ba ACP atu loke rekrutamentu ba públiku hodi bele hetan rekursu ida di’ak, ho KFP ninia prontidaun bele apoia ba iha prosesu rekrutamentu no seleksaun.

Iha parte seluk Asesor Legal Coronel José Alves hateten servisu protesaun Sivil estabelese lalais no posível, tanba atu atende alterasaun klimátia, no mos katástrofe boot ne’ebé akontese iha tina-tinan no inséndiu boot sira.

Nune’e mos wainhira ami halo selesaun ne’e ami mos prepara buat barak no halo konsultasaun oi-oin ba Sekretariadu de Estadu no Ministériu tuteladu, infelizmente sidauk iha resposta no ami halo selesaun ne’e atu responde ba nesesidade sira Protesaun Sivil nian. 

Tuir Asesor Legal katak José Alves, Protesaun Sivil iha obrigasaun halo nomeasaun refere, tanba bazeia mós ba enkontru ne’ebé halo iha Gabinete Primeiru Ministru ne’ebé iha konkordânsia bele avansa ho Estatutu Autoridade, tanba presiza duni atu kria kareira espesial ba profesionais Autoridade hodi atende nia dever disponibilidade espesial hanesan F-FDTL no PNTL.