Comissão da Função Pública

Oe-cusse, 11/8/2022 – Komisáriu Komisaun Funsaun Públika portfóliu Planeametu Forsa Traballu,  Avaliasaun Dezempeñu, Formasaun no Dezenvolvimentu, António Freitas partispa serimónia asinatura akordu tékniku no abertura kursu komputador ba funsionáriu públiku nain 21 iha RAEOA, ho kooperasaun entre Instititutu Nasional  Administrasaun Públika (INAP) ho Sentru Treinamentu Komputador, ho Universidade Superior Dili Institute of Technology (DIT), Kampus Rejional Oe-cusse DITCREO.

Komisáriu António Freitas iha diskursu hateten, kursu IT ba funsionáriu nain 21 iha RAEOA inisiu husi kursu sira seluk tuir mai, maibé depende planu programa husi Prezidente Autoridade no Sekretariu Rejional Administrasaun nian.

Kursu IT ba dala uluk foka liu ba funsionáriu ne’ebé la iha koñesimentu ba operasaun komputador, tanba ne’e formasaun ne’e realiza nu’udar preparasaun ba izame teste promosaun elektróniku ne’ebé sei hala’o iha tinan 2022. Maibé, husu atu kontinua halo identifikasaun ba funsionáriu sira seluk ne’ebé laiha koñesimentu ba komputador atu bele tuir kursu.

Iha fatin hanesan Diretor Jeral INAP, Agostino Letêncio de Deus hateten, kapasitasaun rekursu umanus hola papel importante ida iha adminitrasaun públika  maka kareira no kapasitasaun, tanba bainhira ema nia kareira aumenta, kapasitasaun tenki la’o atu responde ba nesesidade servisu. 

Programa kursu ne’e sei hala’o iha kampuz DITKREO Oe-cusse ho durasaun semana rua ho oras 40 partisipa funsionáriu nain 21 kompostu mane nain 20 no feto nain 1, ne’ebé mai husi instituisaun Bombeiros, Administrasaun, Agrikultura, solidadridade sosial,  seguranca sivil. Bainhira remata kursu partisipantes sei hetan sertifikadu atu asegura ba programa promosaun grau ho  valor pontuasaun 10.

Akordu Tékniku ne’e ho koperasaun asina husi Diretor Jeral INAP Agostino Letêncio de Deus no Reitor DITKREO, Lambaerto Salu, testemuña husi komisariu KFP, António Freitas no Prezidente Autoridade RAEOA, Arsénio Paixão Bano no Sekretáriu rejional sira, ne’ebé hala’o iha salaun enkontru Administrasaun Numbei.

Hafoin asina akordu komisáriu António Freitas hamutuk ho Diretor Jeral INAP no Reitor DITKREO ba vizita diretamente hodi haree besik kondisaun no fasilidade komputador ne’ebé atu fornese formasaun ba funsionáriu sira iha kampuz DITKREO Palaban Oe-cusse.