Comissão da Função Pública

KFP reprezenta husi Prezidente, Faustino Cardoso Gomes, Komisária Maria de Jesus Sarmento akompaña husi Sekretaria Ezekutiva Maria da Costa Oliveira no Diretora Nasional Rekrutamentu no Dezenvolvimento Kareira iha Funsaun Públika Marcelina Irene dos santos Mesquita  no ekipa tékniku partisipa  enkontru Konsellu Ministru hodi fó esplikasaun no justifikasaun téknika ba proposta rezolusaun Governu kona-ba definisaun vaga ba promosaun funsionáriu públiku rejime jeral ba tinan 2022.

Prezidente KFP esplika, depois rona tiha esplikasaun no justifikasaun  téknika sira ne’ebé Komisaun hato’o, ikus mai Konsellu Ministru aprova ho aditamentu téknika liu husi rezolusaun Governu nian ne’ebé define vaga hamutuk 866 ba funsionárius públikus rejime jeral ne’ebé priense kriterius no kondisaun mínimas atu tuir promosaun ne’ebé Komisaun Funsaun Públika sei hala’o iha tinan 2022. La’ós de’it númeru vagas 866 ne’e maibé, iha aprezentasaun téknika KFP aprezenta implikasaun finanseira ba  promosan vaga 866 ne’ebé tuir KFP nia haree no análize nia kalkulasaun téknika vaga 866 ne’e  sei fó implikasaun orsamentu pur volta   rihun atus hat resin  ne’ebé sei hatama ba orsamentu tinan 2023.

Tamba funsionáriu  sira ne’ebé maka sei tuir teste depois ikus mai hetan promosaun, sei hetan efetuasaun hahú konta iha loron 1 fulan janeiru 2023.

Alende KFP f’ó esplikasaun no justifikasaun téknika, KFP mós rona preokupasaun sira liga ho idade pensaun no reforma, rekrutamentu, progresaun, inklui mós preokupasaun sira seluk ne’ebé ligadu ho promosaun ba rejime espesial nian. Tamba rejime geral tinan ida ne’e tama ona ba dala haat, enkuantu  rejime espesial seidauk hahú,  tamba liu husi enkontru Konsellu  Ministrus,  KFP alerta hodi  fó hanoin, akonsella ba ministru sira atu oinsá maka ministériu ida-idak iha sira nia responsabilidade  proativa hahú hanoin oinsá maka bele avansa ba preparativas ba iha promosaun rejime espesial sira nian, ne’ebé tuir dadus rejime espesial  pur volta 20 resin, ne’e mai husi ministériu hot-hotu.

Hanesan Ministériu Saúde maka rejime espesial númeru barak liu, tuir mai Ministériu Edukasaun Juventude no Desportu, Ministériu Justisa, Ministériu Turizmu Komersiu no Industria no mós iha ministériu sira seluk.

Prezidente haklean liga ho aditamentu proposta ne’e kona-ba númerus ne’ebé la iha harmonia iha kontraria malu oituan tuir ema téknika sira dehan, iha diskepansia númerika kona-ba númeru vaga ne’ebé maka presiza tetu no hetan konsiderasaun no aprovasaun.

Nune’e mós kona-ba númeru funsionárius rejime geral to’o ohin loron nian ajusta tiha ona. Alende ne’e liga ho data no tempu ba promosaun depende ba rezolusan Governu bainhira Konsellu Ministrus aprova no publika ona iha jornal repúblika, KFP hetan ona nia baze legal atu hodi hahú ona nia servisu máximu.

Ba preparativus promosaun ba tinan ne’e KFP hahú tiha ona iha fulan Marsu 2022  identifika ona númeru funsionáriu ne’ebé priense rekezitus minimu primeiru lista haruka ona ba kada ministériu hodi hein  de’it wainhira rona keixa ou reklamasaun  husi ministériu ida-idak ekipa Komisaun hadia depois sei publika tan pelo menus to’o dala tolu.

Ne’ebé  iha âmbitu ida ne’e maka KFP servisu makas halo komunikasaun no koordenasaun ho ministériu no instituisaun públiku no munisípiu sira atu informasaun ne’e to’o duni iha karaik  no funsionáriu sira hotu asesu ba informasaun hodi nune’e sira iha biban atu hato’o reklamasaun liga ho dadus ne’ebé maka KFP fó sai.