Comissão da Função Pública

Prezidente Komisaun Funsaun Públika, Faustino Cardoso Gomes  hala’o vizita ofisial ba iha Ospital Regional Eduardo Ximenes Baucau no Ospital Antigu Ria-Mare Klínika Veteranus David Alex Dai-Tula munisípiu Baucau, iha kinta feira, (31/03/2022).

Prezidente KFP, Faustino Cardoso Gomes hateten, objetivu husi vizita ba ospital regional Eduardo Ximenes no Klínika Veteranus David Alex Dai-Tula iha munisípiu Baucau atu haré besik situasaun jeral  jestaun rekursus umanus, asiduidade no pontualidade servisu, infrasaun disiplinar, formasaun ba pesoál Saúde, sistema arkivu no mós difikuldades ekipamentus ne’ebé iha, difikuta ba atendimentu ba públiku no pasiente sira durante ne’e.

Hafoin vizita  ba kada diresaun, kontinua halo enkontru ho Diretur ospital Regional Eduardo Ximenes no Servisu munisipal saúde munisípiu Baucau ho nia estrutura hodi rona mós programa área saúde ne’ebé implementa durante ne’e liga ho polítika desentralizasaun.

Diretur servisu munisipal saúde munisípiu Baucau, Domingos Reinaldo da Costa Guterres hamutuk ho estrutura  Baucau durante enkontru ho Prezidente KFP  nia esplika, servisu pesoál sira iha ospital regional Eduardo Ximenes Baucau, ne’ebé lor-loron sempre halo atendimentu ba públiku, hare fasilidade no aimoruk ba tratamentu ba pasiente durante ne’e la’o di’ak, maibé difikuldade ne’ebé sira enfrenta maka avaliasaun dezempeñu ne’ebé kada tinan hala’o maibé laiha rezultadu. No mós médiku espesialista ne’ebé remata nia estudu maioria rezeita atu koloka iha ospital referal sira no hakarak servisu hotu iha ospital nasional Díli.

Hatan ba preokupasaun ne’e Prezidente KFP, Faustino Cardoso Gomes esplika kona-ba avaliasaun desempeñu la kleur tan iha ona solusaun, tanba iha ona diploma konjunta entre ministériu saúde no Komisaun Funsaun Públika atu hakat ba progresaun tuir dekretu lei ministériu saúde nian ho numeru 13/2012, kona-ba médiku espesialista ne’ebé rezeita destaka ba iha Munisípiu sira.

Komisaun intende katak, médiku Timoroan rekruta barak ona ne’ebé fó ona formasaun no regula iha sistema  no bainhira konklui ona nia estudu tenki destaka ba munisípiu ida bazeia ba vaga ne’ebé deskreve no konkore ba maibé, iha situasaun balun ne’ebé komisaun tetu ida maka pur interese ou importansia uniaun familia nian.

Alende ne’e haré mós kona-ba ajustamentu salarial funsionáriu sira ne’e depende ba ajustamentu grau ne’ebé servisu rekursu umanus kada ministériu haruka ba KFP hodi prosesa ba iha payroll Ministériu Finansas.

Entretantu diretur servisu munisipal saúde, munisípiu Baucau, Domingos Reinaldo da Costa Guterres esplika, Klínika Veteranus David Alex Dai-Tula munisípiu Baucau Governu liu husi ministériu saúde harii  Klínika ne’e ba tinan rua ba kotuk ho objetivu atu fó asistensia saúde espesial ba veteranu sira ne’ebé sofre moras, tanba ne’e servisu munisipal saúde munisípiu Baucau koloka  ona médiku nain 4, enfermeiru nain 3 no farmasista nain 1 hodi halo servisu iha klínika refere.

Autoridade munisipal saúde munisípiu Baucau kosidera menus rekursu umanus atu koloka iha postu saúde hamutuk 28 no sentru saúde 91 inklui klínika ne’ebé estabelese ona iha munisípiu Baucau laran tomak hodi fó asistensia ba komunidade.