Comissão da Função Pública

Dili, 3 Juñu 2022 – Nudar loron abertura ba atividade sira hodi komemora loron Funsaun Públika ne’ebé sei monu iha loron 15 jullu no responsável ba organizasaun eventu refere husi Ministériu Administrasaun Estatal (MAE) ho tema prinsipal “Hakbi’it Servidores Estadu Hodi Asegura Kualidade Servisu Ba Públiku Iha Âmbitu Desentralizasaun Administrativa no Futuru Poder Lokal Iha Timor-Leste”.

Iha atividade balun mak hala’o iha loron abertura ofisial  hahú ho ko’a fita, loke banner, husik manu ponbu, entrega simbólikamente material ekipamentu desportu ho modalidades sira hanesan voleibol, futebol salaun, basketbol no dada tali.

Iha sesaun dada tali ekipa mane husi Ministériu Interior manán ekipa MAPCOM, no ba ekipa feto husi MESSK manan Ministériu Defeza.

Durante fulan juñu nia laran sei realiza atividade sira hanesan Semináriu, limpeza jeral, bazar baratu, Jornada “La’o Tuir  Ain Fatin”. Tinan ne’e (2022), liu husi ein kolaborasaun entre MAE, MTCI, KFP, Comissão Nacional Chega (CNC), Ministériu Asuntus Kombatentes Libertasaun Nasional (MAKLN) realiza jornada la’o tuir ain fatin ba Saudozu Nicolau Lobato ikus nian ne’ebé sei hahú husi Remexio to’o Turiscai no sei realiza Chega Tour ho objetivu, lori funsionáriu sira ba vizita fatin istóriku iha Dili laran, alende ne’e realiza mós iha munisípiu sira.

Objetivu husi Jornada “La’o Tuir Ain Fatin” atu buka hasa’e koñesimentu servidór públiku sira nian konaba istória rezisténsia li-liu ba dezafiu sira mak sira hasoru iha tempu ne’ebá, atu oinsá bele banati tuir prinsipiu no valór sira mak husik hela husi heroi sira.

Iha véspera ba loron komemorasaun sei iha atividade Marxa Saudável no Misa Agradesimentu.

Komemorasaun LNFP ne’e oinsá atu fó valorizasaun ba funsionáriu Estadu tantu funsionáriu permanente no ajente administrasaun públika no funsionáriu kazuais sira ne’ebé haknár an iha setór públiku.

Partisipa iha lansamentu abertura ne’e Ministeriu Prezidensia Konsellu Ministru, Fidelis Magalhães reprezenta Primeiru Ministru, Ministru MAE, Sekretariu Estadu Terras no Propriedades, komisarius KFP no reprezentante Prezidente CNE komisáriu CNE.