Comissão da Função Pública

Presiza halo harmonizasaun ba Dekretu Lei nú. 21/2021 kona-ba subsídiu transporte ba funsionáriu no kargu diresaun, xefia ba rejime jeral, exeptu funsionáriu no kargu diresaun, xefia rejime espesial hanesan iha Ministériu Edukasaun no Ministériu Saúde. Atu transforma diresaun patrimoniu Estadu sai Instituto Públiku, nune’e halo jestaun ne’ebé di’ak ba patrimoniu Estadu hodi kontribui ba reseita Estadu.

Maske nune’e Komisáriu KFP, António Freitas husu ba kargu diresaun xefia sira iha kada ministériu atu kontribui ba implementasaun rezolusaun Governu nú. 130/2021, 29 Setembru kona-ba jestaun no reklamasaun veikulu Estadu, tanba bainhira ekipa integradu mak ba rekolla ho obrigatóriu sei  prosesa tuir lei no orden.

Komisáriu Komisaun Funsaun Públika, António Freitas hato’o rekomendasaun hirak ne’e bainhira sai orador hodi ko’alia kona-ba utilizasaun patrimoniu Estadu haree husi prespektiva Administrasaun Públika  iha sesaun traballu kona-ba diseminasaun prosesu no prosedimentu jestaun patrimoniu Estadu, iha âmbitu implementasaun polítika jestaun frota tuir rezolusaun Governu nú. 130/2021 ne’ebé organiza husi Ministériu Finansas liu husi Diresaun Jeral Jestaun Patrimoniu Estadu.

Komisario António Freitas afirma, sugestaun sira ne’e hato’o pertinente atu konsidera, kontinua kanaliza ba ministériu relevantes hodi hato’o ba Konsellu Ministru hodi hadia desizaun kona-ba subsidiu transporte ne’ebé konsidera hamosu deskontentamentu.

Tanba funsionáriu públiku rejime espesial iha Ministériu Edukasaun no Ministériu Saúde la hetan direitu ba subsidiu maibé, parte jestaun patrimoniu Estadu ba rekolla transporte ne’ebé durante ne’e kargu diresaun xefia sira uza hodi hala’o servisu.

Hatan ba preokupasaun no rekomendasaun sira ne’e diretor jeral patrimoniu Estadu, Januário da Gama promote sei konsidera preokupasaun hirak ne’e no husu ba parte hotu atu kontribui ba desizaun Governu kona-ba jestaun patrimoniu Estadu.

Partisipa iha aktividade sesaun traballu integradu ne’ebé hala’o iha loron 02/06/2022, iha salaun Lalini Larigutu, CNE Colmera Dili, konta ho partisipasaun Diretor Jeral, Diretor Nasional, xefe departamentu husi kada ministériu, Presidente Autoridade, Administrador munisípiu sira, Komisáriu KAK no Adjuntu PDHJ, Adjuntu Komisáriu Polísia Nasional Timor Lorosa’e (PNTL).