Comissão da Função Pública

Categories: Notícias

MTC Estabelese Tan Diresaun Transporte no Komunikasaun iha Munisípiu 5

Ministériu Transporte no Komunikasaun iha tersa-feira, (29/04/2025) –ne’e estabelese tan diresaun lima ba iha munisípiu lima, kompostu husi Aileu, Ainaro, Ermera, Liquiça no Manatuto ho durasaun to’o 31 Dezembru 2025.

Serimónia ne’e partisipa mós husi Prezidente Komisaun Funsaun Públika, Agostinho Letêncio de Deus hodi halo mós termu aseitasaun ba diretor nain lima, kompostu husi mane nain 4 no feto nain ida, atu lidera no organiza atividade servisu iha diresaun Munisipais Transportes no Komunikasoens iha Munisípiu lima ne’e.

Ministru Transportes no Komunikasaun, Miguel Marques Gonçalves Manetelu no Vise-Ministru Administrasaun Estatál, Jacinto Rigoberto G. de Deus liu husi diskursu esplika, estabelesimentu diresaun munisipais Transportes no Komunikasoens iha munisípiu lima, ikus ne’e nu’udar programa prioridade IX Governu nian, hodi kompleta ona servisu diresaun munisipais Transportes no Komunikasoens iha munisípiu sira inklui RAEOA hodi desentraliza servisu sentral ba iha munisipal, hodi hakbesik prestasaun servisu, atendimentu no fasilita sidadaun sira trata dokumentus kareta no motor iha kada munisípiu baze ba estatutu Administrasaun Públika, baze parte preparasaun ba implementasaun polítika desentralizasaun.

Ministru MTC husu ba Diretor Diresaun Muniaipais Transportes no Komunikasoens munisipal sira atu hodi kria kondisaun, fasilidade liu husi koordenasaun servisu ida di’ak, ho Prezidente Autoridade no parte polísia iha munisípiu ida-idak, hodi kontinua harmoniza servisu ba iha atendimentu públiku ida ne’ebé efisiensia, efikasia no responsabilidade.

Partisipa iha serimónia estabelesimentu diresaun munisipais Transportes no Komunikasoens, no serimónia asina termu aseitasaun ba diretor nain lima mak, Prezidente Autoridade Manatuto, Liquiça, Ermera, no reprezentante husi Sekretáriu muniípiu Aileu no Ainaro, kargus diresaun no xefias MTK, no APORTIL.