Comissão da Função Pública

Komisáriu Komisaun Funsaun Públika,  Fausto Freitas da Silva, responsavél ba portefóliu ba Pensaun no Reforma partisipa seremónia asinatura termu kontratu ba Ajente Administrasaun Públika ba Autoridade Munisípiu Manatuto iha kuarta-feira, 30 -04-2025, iha salaun Parokial Manatuto.

Iha diskursu Komisáriu Komisaun Funsaun Públika, Fausto Freitas da Silva hateten ba emposadu sira ba ajente administrasaun públika mai ho komportamentu di’ak, presta servisu ida di’ak hodi hetan avaliasaun di’ak atu bele tuir mai wainhira iha vaga ruma bele aplika ba permanente. Tanba imi mai hela iha dalan ba revolusaun, katak prepara imi nia aan oinsá bele ba permanente, kuandu komportamentu ladiak iha servisu estadu nian mak sei la hetan.

Fausto Freitas da Silva husu ba emposadu sira, atu serví ho di’ak ba povu no nasaun, wainhira komete iregularidade ruma mak sei enkamiña ba KFP hodi apura sei hetan sansaun.

“Kuandu presta servisu ba Estadu mak halo iregularidade sei ba Funsaun Públika, depois apura investigasaun foin bele  fó pena, tanba ne’e tenke serví didiak, serví estadu no imi nia rain ne’e serví ba povu no nasaun, serví rai Timor Lorosa’e husi Tutuala to’o fronteira. Ha’u haree mesak foinsae de’it, tenke servisu ho laran, ho neon, tanba nasaun ne’e iha mimi nia liman, serví didiak rai Manatuto ein jeral ba Timor-Leste tomak”, dehan Komisáriu KFP.

Juramentu pose ne’ebé imi halo jura ba biblia, tenke serví didiak, hanesan funsaun públika balun servisu uluk hanoin iha KFP saláriu kiik halai ba hotu NGO, tanba osan boot, ita mai labele haree ba saláriu boto maibé saida mak ita presiza kontribui ba rai ida ne’e, tanba ne’e servisu didiak, komporta di’ak atu oinsá hetan avaliasaun dezempeñu di’ak hodi hetan susesu, enkoraja komisáriu ba emposadu sira iha asinatura termu kontratu ba ajente.

Iha tempu hanesan Prezidente Autoridade munisípiu Manatuto iha ninia intervensaun agradese ba juri toamk ne’ebé halo ona prosesu rekrutamentu ne’e ho transparansia tebes, iha partisipasaun ba hot-hotu ba vagas 42 ne’ebé mak liu hodi mai integra iha ne’e.

Ohin loron konsege ultrapasa no hetan fiar, no jura  kompromisu onra hodi jura atu halo tuir de’it servisu Funsaun Públiku nian, dehan Presidente Autoridade Manatuto.

Emposadu ajente ne’ebé simu posse ne’e hamutuk 42, kompostu husi feto nain 18 no mane nain 24 no partisipa iha serimónia ne’e prezensa husi Padre Parokia Manatuto, Autoridade Manatuto, Diretor Jeral MAE no ekipa juri, komandante PNTL, funsioárius no família emposadus.