Comissão da Função Pública

Funsionáriu Públiku nu’udar servidor Estadu no povu tenki kaer metin ba prinsipiu Saõ Tomas More nian hodi kaer metin  patriotizmu, poder no justisa sosial, luta ba bem-estar ema barak nian. Bainhira iha poder ukun maibé, laiha patriotizmu domin ba povu,  poder sei sai hanesan naha todan ida ne’ebé hanehan povu no nasaun. Poder ukun tenki bazeia ba domin ba povu  no domin ba rai/nasaun, no poder tenki uza ba justisa sosial hodi kuriji buat hirak ne’ebé sala iha lala’ok sira. 

Padre Vigariu Parokia Nossa Senhora De Fátima Ainaro, Eugénio Redentor ko’alia liafuan hirak ne’e iha nia omelia bainhira preside misa agradeimentu iha ámbitu Komemorasaun Loron Nasionál Funsaun Públika ba dala 10 ho tema “Hametin Espíritu Nasionalizmu no Patriotizmu, tane ás étika profisionalizmu hodi servi povu no nasaun” ne’ebé organiza husi MACLN  iha Munisípiu Ainaro, iha segunda-feira, (15/07/2024).

Padre Eugénio Redentor hateten, servidor Estadu nia knár maka hamutuk ho Jesus hodi kaer surik kroat hodi luta ba bem-estar ema barak nian, hodi sai husi fenómena ida kona-ba funsionáriu públiku hakarak sai funsionáriu permanente hodi  hetan de’it saláriu ida estavel no seguru. Prezensa Jesus nia ne’ebé mai lori surik, hatudu funsionáriu públiku sira tenki hamrik lori surik halo servisu hodi implementa poder polítika, tenki bazeia ba domin, ba povu- rai no nasaun. Poder ida ne’ebé tenki uza ba justisa sosial, hodi kurizi buat ne’ebé la’o laloos, maibé  hadomi de’it la to’o.

Padre ne’e esplika, nu’udar funsionáriu públiku maske hadomi povu maibé, kuandu laiha kbiit  sei labele halo mudansa. Tanba ne’e atu halo mudansa ruma iha sosidade liu-liu ba povu nia moris ba di’ak presiza kaer metin patriotizmu, poder no justisa sosial. Funsionáriu públiku ne’e servidor do Estadu no  povu, Administrador ba Estadu administra Estadu ninia riku sira no povu nia moris ba di’ak.  

Tuir padre vigariu ne’e katak, funsionáriu públiku nu’udar servidor Estadu  no la’ós nain ne’ebé dala ruma hanoin katak, hakarak goja tuir ida-idak nia hakarak maibé, lori surik hodi luta ba barak nia interese ba moris di’ak. Komemorasaun Loron Funsaun Públika ba tinan 2024 ho tema ne’ebé ko’alia kona-ba unidade nasionál no étika profesional nu’udar norma, étika ne’ebé forma konsensia profesional atu sai hanesan orden ida ba funsionáriu nia profisaun ne’ebé tenki moris tuir ema barak nia lala’ok sira.

Servisu profisional kaer metin imparsialidade funsaun públika, onestidade, integridade, kompeténsia, responsabilidade, lealdade ba nasaun, ne’e prinsipiu ne’ebé labele sai de’it teoria, ne’ebé hatur iha estatutu Funsaun Públika maibé, tenki sai funsionáriu sira nia luta lor-loron banati tuir veteranus sira nia luta ba ukun rasik an no iha dezenvolvimentu funsionáriu públiku tenki sai eroi foun hodi luta ba dezenvolvimentu hodi hadia povu nia ekonomia. Timor oan hotu hamrik luta hasoru komunizmu no perdizmu no hamutuk fanu konsiensia hodi luta ba dezenvolvimentu hodi hadia povu ba moris di’ak, esplika Padre selebrante ba misa agradesimentu LNFP-X iha Ainaro.

Hafoin misa, membru governu, funsionárius sira no konvidadu sira kontinua vizita ba ossuáriu iha Ainaro hodi kari aifunan ba iha restus mortais hamutuk 2.593 hodi fó omenazen ba eroi sira.