Comissão da Função Pública

DILI, 25 Fevereiru 2026 – Komisária ba Asuntu Dezenvolvimentu Karreira Espesiais, Anita Tavares Ribeiro de Jesus, ne’ebé mós nu’udar Prezideti Interina, hateten katak Komisaun Funsaun Públika (KFP) nu’udar instituisaun ne’ebé iha responsabilidade ba kapasitasaun, konsidera programa formasaun lian Inglés ba ASEAN (English Language Training for ASEAN – ELTA) importante tebes. Formasaun ne’e fó ba Diretór-Jerál, Diretór Nasionál, no Xefe Departamentu sira ne’ebé sai nu’udar pontu fokal husi liña ministeriál sira. Objetivu prinsipál mak atu presta servisu di’ak liután hodi kontribui ba serbisu ASEAN nian, liuliu bainhira Timor-Leste sai ona membru permanente.

Iha diskursu, Komisária Anita Tavares husu ba formadu sira atu prátika beibeik lian Inglés iha fatin serbisu.

Nia mós dehan katak iha posibilidade atu hala’o formasaun hanesan ba funsionáriu sira iha kada instituisaun hodi kontinua prepara rekursu umanu ne’ebé forte iha lian Inglés hodi apoia adezaun ba ASEAN. No KFP sei kontinua halo koordenasaun ho MNEK no PROSIVU liu husi apoiu fundus husi Embaixada Austrália hodi fó formasaun ba pilar rua seluk.

Entretantu, Diretora-Jerál ba Asuntu ASEAN, Elisa Maria da Silva, esplika katak pontu fokal sira-ne’e sei partisipa iha enkontru ASEAN sira ne’ebé sei mai hodi ko’alia kona-ba polítika esterna Timor-Leste nian, liuliu ligadu ba pilar tolu prinsipal iha ekonomia, sosiál, no polítika seguransa. Nu’udar pontu fokal presiza lee, interia ninia substansia sira, iha kbiit atu prepara dokumentu, foti nota eh minuta ho lian Inglés husi rezultadu enkontru nian mak oinsá buka identifika no aprezenta ninia asaun sira, no hatene planu estratéjiku husi pilar seluk nian husi membru ASEAN ida-idak hodi bele aliña no depende ba iterese Timor-Leste nian iha enkontru ASEAN.

Diretora Jeral ba Asuntu ASEAN ne’e dehan katak, serbisu ne’ebé pontu fokal sira sei hala’o mak oinsá kria tabela hodi identifika asuntu, progresu, no pozisaun nasionál; prepara dokumentu no halo minutas enkontru nian ho lian Inglés no analiza planu estratéjiku husi membru ASEAN seluk hodi alinia ho interese Timor-Leste nian.

Formadu ne’ebé partisipa iha kursu ELTAA hamutuk Nain 20 (Feto 4 no Mane 16), ne’ebé realiza iha Edifísiu foun E-Recruitment, Matadouro, Dili.

Formasaun ne’e la’o durante fulan tolu, hahú husi fulan-Outubru 2025 no remata iha meadu Fevereiru 2026.