Comissão da Função Pública

Prezidente Komisaun Funsaun Públika, Faustino Cardoso Gomes partisipa iha programa rádiu Metro FM (94.7 MHtz) hodi halo balansu ba susesu no  oinsa atu profesionaliza Funsaun Públika.

Susesu mandatu daruak KFP nian mak konsege hala’o promosaun, seleksaun pur méritu, distinsaun premius no seluk tan.

“Susesu boot ida maka iha II mandatu KFP rejista kona-ba promosaun Funsionárius Públikus iha teritoriu nasional tomak iha 10,455 ikus mai iha nain 1,354 mak konsege liu no sae grau as liu ho efeitu nebe aplika desde janeiru 2020, maibé klaru iha ita orsamentu duo-desimu efeitu husi promosaun ida ne’e karik seidauk sente. Maibé sira rejista ona nudar funsionárius promovidus ba iha grau as. Susesu seluk mak konsege define loron nasional Funsaun Públika ne’ebé mak komemora tinan-tinan, jornada la’o tuir ain fatin saudozu sira nian, lori funsionáriu sira ba haree realidade moris povu ninian too nia istória atu motiva, inspira  no oinsa mak bele servisu diak liu tan. Alende ne’e susesu seluk ba sevisu hamutuk ho insituisaun sira seluk, instituisaun estadu sira seluk hanesan KAK, PDHJ, IJE atu oinsa hametin liu tan integridade Funsaun Públika, nune’e radiu mós haklaken informasaun sira. Ida ne’e mak Komisaun hala’o maibé rejista mós atividade sira balun ne’ebé mak Komisaun seidauk konsege realiza,” dehan Prezidente KFP Faustino Cardoso Gomes iha sesaun entrevista iha programa povu nia matadalan iha loron tersa feira, (16/06/2020).

Ba mandatu datoluk nian Komisaun kontinua prioritiza promosaun, seleksaun pur méritu ba kargus diresaun xefia sira, distinsaun no premius ba bens estar funsionáriu sira nian no mós revé fila fali prioridade sira seluk ne’ebé mak iha, nune’e haree mos ba planu estratejiku sira ne’ebé mak presija halo atualizasaun.

KFP mós mantein prinsipiu meritukrasia ba ambitu ida ne’e KFP sei kontinua halo komunikasaun, kordenasaun ho instituisaun relevante sira, atu oinsa ita bele komunga hamutuk iha vizaun hanesan kona-ba importansia realizasaun seleksaun pur meritu ida ne’e importante tebes.

Nune’e dirijente masimu Funsaun Públika husu atu okupante kargu sira husi instituisaun Estadu hotu atu komprende ezijensia ida ne’e no klaru katak nivél altu mós ami sei buka atu halo komunikasaun, liu-liu membru governu sira. Ami sei halo komunikasaun oinsa atu atualiza, informa ba sira kona-ba situasaun no progresu sira ne’ebé mak iha ao mesmo tempo hamutuk konkista susesu, espetativa sira ligadu ho Funsaun Públika.

Hakarak enkoraja funsionariu sira atu kontinua tama servisu hala’o knar sira ne’e ho responsabilidade, kualidade, ho prestasaun ba povu tuir ida-idak nia area kompetensia grau responsabilidade.

Husu ba funsionariu sira atu kontinua kumpri nafatin regras COVID-19 ninian iha ida-idak nia servisu fatin, uza masker, fase liman bebeik, nune’e mos oinsa mak bele teste nafatin temperatura isin (tes suhu badan) karik iha problema ruma mak deskonfia sinal COVID-19 ninian buka atu hatoo lalais ba entidade relevante sira.