Comissão da Função Pública

Segunda-feira, 19 Maiu 2025, Iha salaun Aikurus Binani Matadoru, Dili, Ministériu Edukasaun servisu hamutuk ho Komisaun Funsaun Públika hala’o teste eletróniku ba bolsa kandidatu profesór sira ba Ensinu Sekundáriu Jerál no Ensinu Sekundáriu Tékniku-Vokasionál dala tolu iha tinan 2025 ho tópiku “Construindo Juntos A Nossa Nação com Educação de Qualidade e Inclusiva”.

Prezidente Repúblika José Manuel Ramos Horta, akompaña husi Ministra Edukasaun Dulce de Jesus, Prezidente Komisaun Funsaun Públika Interinu José Telo Soares Cristovão, no komisáriu sira, halo abertura ba atividade teste ne’e.

Iha diskursu abertura, Prezidente Repúblika José Manuel Ramos Horta konsidera katak laiha setór ida importante liu setór edukasaun, tanba edukasaun ne’ebé hahú husi ensinu pre-eskolár, ensinu básiku, no ensinu sekundáriu jerál no tékniku vokasionál importante atu dezenvolve nasaun ho di’ak tenke iha sistema edukasaun ida ne’ebé kualidade di’ak.

Prezidente Repúblika José Ramos Horta haree ba realidade iha Timor-Leste durante ne’e mosu preokupasaun boot ida ba setór edukasaun tanba laiha Governu ida konsege halo polítika di’ak, tanba sistema polítiku partidáriu laiha polítika kontinuidade ba sistema edukasaun, maske iha planu estratéjiku dezenvolvimentu nasionál.

Dezastre boot ida ne’ebé akontese mós iha Funsaun Públika, númeru funsionáriu aas liu númeru populasaun tanba kada tinan númeru funsionáriu kontinua aumenta beibeik, tanba ne’e presiza iha reforma radikál ida. Ha’u haree inisiativa Ministra Edukasaun nian hodi hahú prosesu reforma iha setór edukasaun importante no husu atu kontinua mantein no dezenvolve polítika reforma ida ne’e ba futuru dezenvolvimentu Timor-Leste nian, dehan Prezidente Repúblika.

Xefe Estadu fó korajen ba Ministra Edukasaun ho nia estrutura tomak atu lalika ta’uk atu kontinua mantein desizaun ba reforma radikál ne’ebé hahú ona iha setór edukasaun, selae númeru lisensiatura ne’ebé prodús kada tinan iha universitáriu sira sei laiha valór no sei bele adia kualidade edukasaun iha Timor-Leste ba futuru.

Enkuantu Ministra Edukasaun Dulce de Jesus konsidera prezensa Prezidente Repúblika nian iha serimónia abertura teste eletróniku ba bolsa kandidatu profesór sira ba ensinu sekundáriu jerál no ensinu sekundáriu tékniku-vokasionál hanesan onra boot ida no sai sasin hodi fó apoiu ba Ministériu Edukasaun no Komisaun Funsaun Públika ne’ebé tenta atu lori sistema edukasaun ida di’ak ba Timor-Leste. Servisu hamutuk Ministériu Edukasaun ho CFP durante ne’e hala’o ona teste ba profesór pre-eskolár, ensinu báziku no ba ida ne’e teste ba ensinu sekundáriu jerál no ensinu tékniku vokasionál. Objetivu boot ba servisu hamutuk ida ne’e maka atu hasa’e kualidade edukasaun no hadi’a sistema edukasaun iha Timor-Leste. Edukasaun baze ba sosiedade ne’ebé di’ak iha futuru, tanba liu husi edukasaun sei hakbiit, haburas hanoin krítiku no kuda matenek ba foin-sa’e sira atu sai lideransa di’ak ba Timor-Leste iha futuru. Rekoñese feto importante iha prosesu selesaun ba feto iha prosesu transformasaun ida ne’e krusiál tebes atu kaer knaar rekursu ba iha prosesu selesaun no konotasaun ba iha formasaun.

Ministra. Edukasaun esplika, pasu primeiru Ministériu Edukasaun hahú uluk halo kuadru pesoál liu husi servisu hamutuk ho sosiedade sivíl hodi hala’o levantamentu hodi identifika profesór hira ba iha pre-eskolár, ensinu básiku no ensinu sekundáriu jerál no tékniku vokasionál. Ministériu Edukasaun mós halo análize ida ba númeru estudante, sala de aula hira mak disponivel no turnu hira iha eskola ida-idak iha territóriu Timor-Leste, hafoin hakat ba faze atu estabelese dadus no kritéria selesaun ba profesór sira bazeia ba lei baze edukasaun ne’ebé define profesór sira ba nível pre-eskolár, eskola ensinu báziku no ensinu sekundáriu jerál no tékniku vokasionál.

Molok hakotu diskursu ne’e Ministra Edukasaun relata, kandidatu ba bolsa kandidatu ba ensinu sekundáriu jerál no tékniku vokasionál ne’ebé admitidu tuir teste hamutuk 10.669 pesoál, kompostu husi feto 5.748 no mane 4.939. Haree husi númeru ne’e, feto kontinua okupa númeru aas liu. Liga ba alokasaun sei bazeia ba valór ne’ebé aas liu no bazeia ba nesesidade iha kada eskola ida-idak iha Timor-Leste no kandidatu mós prontu atu koloka iha fatin ne’ebé de’it.

Partisipa iha abertura reprezentante Prezidente PN Prezidente Komisaun G Parlamentu Nasionál, kargu diresaun xefia husi Ministériu Edukasaun no Komisaun Funsaun Públika.

Teste ne’e hahú 19 Maiu too 16 Juñu 2025 ho totál vagas 1450 ho sistema klasifikasaun ranking. @PXFB