Comissão da Função Pública

Tersa-feira, 01/04/2025 – Prezidente Komisaun Funsaun Públika (KFP), Agostinho Letêncio de Deus no Komisária Anita Tavares Ribeiro de Jesus partisipa serimónia termu aseitasaun no pose dahaát ba manorin ensinu pre-eskolar no ensinu báziku nain 206, kompostu feto nain 147 no mane nain 59, iha salaun IINFORDEPE, Balide, Díli.

Iha diskursu Prezidente KFP, Agostinho Letêncio de Deus senti orgullu no lori KFP nia naran presta testemuñu ba professores foun, ne’ebé ingresa liu hosi rekrutamentu ba bolsa kandidatu ba kuarta faze nian, ne’ebé sei koloka ba eskola sira territóriu nasionál. Eventu ne’e rejista tan konkista ida Administrasaun Públika Timor-Leste nian iha ámbitu rejuvenasimentu mákina administrativa Estadu nian hodi konstitui pasu estratéjiku no oportunidade atu avansa ba introdúz polítika reforma obrigatóriu iha Administrasaun Públika, bazeia ba rezultadu diagnóstiku forsa traballu Funsaun Públika tinan-2023, ne’ebé planu reforma ne’ebé iha pesoál ho tinan 50 reprezenta hosi 35 pursentu, enkuantu projesaun ba to’o tinan 2030 sei koresponde pursentu 51 hosi atuál forsa traballu.

Situasaun ida ne’e mosu tanba, ita seidauk iha lei ba reforma obrigaróriu, ne’ebé la permite dinámika ida ne’ebé efetivu liga ho entrada no saida ba forsa traballu Administrasaun Públika nian. Nune’e, mákina administrativa tuan ba bebeik ne’ebé sei afeta ba produtividade no seleridade iha prestasaun servisu hosi instituisaun públiku inklui setór edukasaun iha eskola sira. Permite destaka katak, proposta definisaun idade limite ba reforma, aliás, regulamentasaun ba lei autorizasaun lejislativa hosi Parlamentu Nasionál ba fikasasaun limite idade reforma (Lei 7/2024 de 23 de Outubro), submete ba Konsellu Ministru no ajenda ona ba reuniaun Konsellu Ministru iha semana ne’e nia laran no bainhira hetan aprovasaun ona sei hahú implementa iha inisiu tinan 2026, tuir projesaun dadus reforma mais de 64% reprezenta hosi pesoál dosente ne’ebé sei reforma, esplika Prezidente KFP.

Iha ambitu serimónia termu aseitasaun no pose ba pesoál hamutuk 206 kareira dosente konstitui pasu ida ne’ebé estratéjiku no konstitui mekanizmu substituisaun ba forsa traballu liu-liu iha kareira dosente, dehan Autoridade Funsaun Públika iha serimónia asinatura termu aseitasaun ba professores bolsa kandidatu. 

Subliña katak, dinámika entre entradas no saídas ba forsa traballu importante tebes, iha korpu dosente ho razaun importánsia hosi papél edukasaun nian ba iha paíz ida nia vida ás tebes. Edukasaun nu’udar meiu ne’ebé bele muda ita-nia koñesimentu, hosi koñesimentu sira mak hetan konstrui ema nia sabedoria, enkuantu sabedoria sai nu’udar aspetu xave ida hodi muda ema ida nia destinu. Nune’e, kuantu mais edukasaun prodúz ema “sábio”, fasilmente oportunidade atu muda sosiedade ida nia destinu!

Molok remata husu ba emposadus ne’ebé ingresa iha kareira dosente hahú hola parte ona mákina Administrativa Estadu nian, no dezafia atu iha dezempeñu ida ne’ebé ekstraordinariu, hasa’e boa vontade, responsabilidade no efetividade hodi kontribui ba meta iha setór Edukasaun atu Timor-Leste bele riku liután kualidade, kuantidade no espesialidade sira Edukasaun nian, ba Timor nia di’ak. Lori KFP nia naran kongratula Ministériu Edukasaun ba susesu sira mak rejista ona, KFP nafatin prontu atu konta ho apoiu nesesáriu sira ba prosesu sira tuir mai. Parte seluk KFP konta mós ho apoiu Ministériu Edukasaun iha ámbitu implementasaun prioridade sira iha kontestu reforma ba jestaun rekursu umanu nian. 

Sorin seluk, Sekretáriu Estadu Ensinu Sekundáriu Jeral no  Ensinu Sekundáriu Tékniku-Vokasional ne’ebé hanesan Ministra Edukasaun Interinu Domingos Lopes Lemos hateten, marka signifikativu ida ba Edukasaun iha programa IX Governu Konstitusionál no reflete kompromisu Ministériu Edukasaun nian ba kualidade no futuru ita-nia edukasaun nian, hodi asegura katak profesór sira-ne’e bele kontribui ba labarik Timor oan sira nia dezenvolvimentu atu lori edukasaun ho kualidade ba teritóriu nasionál tomak. 

Partisipa iha serimonia ne’e Prezidente INFORDEPE, kargu diresaun xefia husi Ministériu Edukasaun hamutuk ho parseiru sira, Diretor Edukasaun Munisipais, no familia emposadus.