Comissão da Função Pública

Governu aprova projetu dekretu lei ba reforma obrigatória ba limite idade iha Administrasaun Públika ho idade 65 no idade 68 esesaun ba médiku espesialista no dosente universitárius.

Hafoin aprezentasaun husi Ministru Prezidénsia Konsellu Ministrus, Agio Pereira, no Prezidente Komisaun Funsaun Públika, Agostinho Letêncio de Deus ba uzu autorizasaun lejizlativa ne’ebé hetan husi Lei númeru 7/2024, loron 23 fulan-outubru, halo alterasaun daruak ba Lei n. 8/2004, loron 16 fulan-juñu, ne’ebé aprova Estatutu Funsaun Públika, Konsellu Ministrus aprova kedas dekretu lei refere.

Diploma ida-ne’e estabelese limite tinan 65 nu’udar idade obrigatóriu hodi remata relasaun traballu funsionárius públikus no ajentes Administrasaun Públika nian, ne’ebé sei akontese automatikamente iha loron ne’ebé traballadór atinje idade refere. Medida ne’e hakarak atu promove joven sira ba kuadrus Administrasaun Públika nian, garante renovasaun jerasionál no hadi’a kualidade no efisiénsia servisus ne’ebé presta ba populasaun. Diploma ne’e determina mós katak Komisaun Funsaun Públika tenke notifika traballadór, ninia entidade empregadora no Seguransa Sosiál pelumenus loron 90 molok hakotu funsaun.

Iha situasaun sira ba interese públiku ne’ebé fundamenta ho loloos, no bainhira labele substitui imediata traballadór ne’e, sei posivel atu prolonga hodi hala’o funsaun, tuir akordu hamutuk, to’o tinan 68 esesaun ba médiku espesialista no dosente universitariu.

Diploma ne’e hahú vigora iha loron 1 fulan janeiru tinan 2026.

Partisipa iha reuniaun Konsellu Ministrus ne’ebé lidera husi Primeiru Ministru Kayrala Xanana Gusmão iha kuarta-feira, 02 Abríl hodi aprezenta proposta reforma obrigatória limite idade iha Administrasaun Públika ne’e Prezidente Komisaun Funsaun Públika, Agostinho Letêncio de Deus no Komisariu ba Portefoliu Pensaun no Reforma, Fausto Freitas da Silva Liurai Taci akompaña husi Asesor sira.