Comissão da Função Pública

Professores iha rejime espesial dosentes maibé hanesan mós funsionáriu públiku ne’ebé presiza kumpri estatutu funsaun públika.

Prezidente KFP, Agostinho Letêncio de Deus esplika, iha administrasaun públika iha mós rejime espesial, ida mak profesorés, tama iha rejime espesial dosentes, maibé sira mós hanesan funsionáriu públiku. Hanesan funsionáriu públiku iha iha estatutu funsaun públika ne’ebé mak regula mós iha ne’ebá kona-ba direitus, deveres no proibisoens sira.

“Profesores sira mós iha rejime espesial dosentes maibé sira mós hanesan funsionáriu públiku, entaun hanesan funsionáriu públiku Ha’u hanoin ita iha  estatutu funsaun públika ne’ebé mak ko’alia hela  kona-ba disiplina, ko’alia kona-ba funsionáriu sira servisu semana ida oras hira? Ko’alia kona-ba sira nia lisensa, wainhira sira moras karik tenke husu lisensa oinsá, falta bebeik karik sansaun saida mak sira hetan? hanesan funsionáriu públiku lei estatutu funsaun públika ne’e vale ba hot-hotu la’ós ba professor sira de’it” esplika Prezidente KFP, Agostinho Letêncio de Deus iha nia knár fatin KFP, iha (22/09/2025).

Tuir Prezidente  KFP katak, tipu disiplina saida mak sira komete, la defini  imediata kuandu iha asuntus disiplinar  ruma ga profesor sira. Baibain prosesu ne’e mai to’o Komisaun Funsaun Públika, liu husi komisáriu ba asuntu disiplinar foin tun ba diresaun disiplinar, kuandu KFP seidauk iha investigasaun ruma, tantu husi inspetur eskola ou diretur eskola sira. Kuandu Komisaun Funsaun Públika liu husi ekipa disiplinar halo fali investigasaun hodi hatene sá iregularidade mak komete husi funsionáriu eh professores hafoin ida ne’e mak ita defini nia tama iha tipu kazu saida hodi hetan pena tuir iregularidade ne’ebé kometidu.

Nia akresenta liután, iha rejime funsionáriu hot-hotu nia iha estatutu  Funsaun Públika  ne’e ema hot-hotu  tenki marka prezensa oito-oras-por-dia, lor-loron,  kuandu funsionáriu ida falta 21dias konsekutivu ne’e mós afeta ba nia kareira, kuandu nia falta 31 dias iha tinan ida nia laran mós afeta atu hapara.