Comissão da Função Pública

Sekretariadu Komisaun Funsaun Públika liu husi departamentu Rekursu Umanus Interna SKFP realiza formasaun kona-ba jestaun administrasaun públika ba funsionárius nain 23 durante semana ida (06-10 Outubru 2025) iha salaun Sentru Juvenil Taibesi.

Formasaun ne’e ofisialmente loke husi Komisáriu Komisaun Funsaun Públika ba Portfóliu Pensaun no Reforma Fausto Freitas da Silva no Sekretáriu Ezekutivu Interinu Diretor UDSIFP, Marfilho Fidel Alvares Pereira.

Iha  diskursu  abertura  Komisáriu KFP ba Portfóliu Pensaun no Reforma Fausto Freitas da Silva hateten, formasaun liga ba jestaun Administrasaun Públika pertinente tebes ba funsionáriu públiku ida atu hasa’e koñesimentu ida di’ak liután ba atendimentu públiku. Formasaun ne’e ho objetivu ida atu evita burokratizasaun, lori servisu publiku besik liu povu no asegura partisipasaun husi sidadaun hotu, no dezafia funsionáriu sira atu kontinua servisu ho di’ak, no koñesimentu ne’ebé hetan iha ne’e ba implementa iha servisu fatin.

Nia dehan, hanesan funsionáriu públiku buka halo atendimentu di’ak kria komunikasaun ida saudavel, planeamentu, monitoriza implementasaun sira. Kumpri ba regra sira ba ezekusaun orsamentu sira ho transparente, jere no uza patrimóniu estadu ho kuidadu. Formasaun ne’e lori benefisiu ba imi hotu, tantu pessoal no professional, transparente no efisiente.

Partisipa iha formasaun ne’e hamutuk nain 23, kompostu husi feto nain 12 no mane 11.