Comissão da Função Pública

Sekretária Ezekutiva SKFP, Maria da Costa Oliveira sai oradora iha diskusaun ne’ebé realiza husi DFAT hodi fahe experiénsia kona-ba lideransa feto iha kareira nian, ne’ebé hala’o iha sesta-feira 04/04/2025.

Objetivu husi diskusaun ne’e hodi hametin abilidade lideransa entre feto professional iha Timor Leste no esplora dezafius no oportunidade sira ne’ebé feto hasoru iha lideransa, fornese estratéjia prátika sira atu navega bareira institusional no promove lideransa ne’ebé responde ba jéneru.

Ho diskusaun ne’e atu deskuti kona-ba kompreende impaktu ne’ebé inklusaun no diversidade jéneru halo iha servisu fatin ida, dezafiu ne’ebé feto sira hasoru iha knaar lideransa nian iha instituisaun públika nia laran.

Durante iha aprezentasaun, Sekretaria Ezekutiva mós enkoraja feto maluk sira atu bele iha vontade aprende no mós prontu simu koresaun sira husi superior tanba, ida ne’e hodi hadi’ak no aumenta liu tan koñesimentu ne’ebé iha ona atu nune’e bele bele sai lideransa feto ne’ebé iha potensialidade oin-oin.

Tenki brani foti desizaun ba an rasik liu husi kompete hamutuk ho mane sira iha área saida de’it mak feto bele, tanba tuir dadus aktual ne’ebé Komisaun Funsaun Públika iha feto ne’ebé okupa kargu iha de’it 25% tan ne’e nafatin enkoraja atu bele partisipa iha formasaun sira nomós aprende liu tan atu nune’e feto mós bele okupa kargu ho pursentajem hanesan mane.

Iha Diskusaun ne’e mai husi entidade oin-oin hanesan, SEI, MACLN, MF, INETL.IP, MoH, MTA, no SECOMS.