Comissão da Função Pública

Komisária I-II Mandatu Komisaun Funsaun Públika, Sra. Maria Olandina Isabel Caeiro Alves.

Sra. Maria Olandina Isabel Caeiro Alves hahú ninia esperensia profisional hanesan professora iha Ensinu Primáriu.

Olandina Caeiro naran ne’ebé sempre temi wainhira servisu hanesan lokutora iha rádiu Maubere no hanesan mós fundadora iha jornal Voz Timor iha tinan 1975. Entre tinan 1980-1990 nia okupa kargus oi-oin iha Administrasaun Públika no mós iha Parlamentu.

Desde tinan 1990 Komisária Olandina Caeiro dedika nia aan husi kauzas sosiais, inkluzivu kontra violénsia doméstika.

Iha tinan 2001, indikada hanesan Komisária Extinta KFP nian, nomeadu mós hanesan Komisária Komisaun Akollimentu, Verdade no Rekonsiliasaun (CAVR) no sai mós fundadora ba Fundasaun ba Paz no Dekokrasia.

Iha loron 14 fulan agostu 2009 nomeadu husi Governu hanesan Komisária Komisaun Funsaun Públika ba mandatu dahuluk, durante mandatu hanesan komisária iha tempu balun de’it, iha 2011 hetan fiar hanesan konsul iha Bali.

Konsidera ba ninia dedikasaun tomak ne’ebé nia presta iha Administrasaun Públika Timor-Leste nian iha tinan 2015 Governu kontinua fó fiar no nomeia ba Komisária KFP mandatu daruak ne’ebé responsabiliza ba portefóliu disiplinar no finansas. Iha meadu tinan 2017, fó fiar hodi ba asume fali kargu hanesan embaixadora iha Malázia.

Durante hanesan komisária iha KFP, nia ema ne’ebé karakter forte, fiar nain, generoza, responsabilidae, profisional. Ho ninia simplisidade ne’e gosta akolhe ema hotu hodi servisu hamutuk ho nia, nia ema ida ne’ebé iha gostu ba arte, múzika, no humorista.  Nia ema ne’ebé gosta apresia beleza, bolu ema sempre ho lian mamar, oin midar, no ema ne’ebé justu no hanesan ba ema hotu.

Querida Komisária Olandina Caeiro, ita boot ninia liafuan murak, di’ak sira ne’ebé sempre motiva ami halo servisu, to’o ohin loron ami kontinua grava iha ami nia fuan.

Querida komisária ninia fin jornada iha mundu ida ne’e hanesan lakon boot ida ba ami hotu, ami lembra querida komisária ninia voz, hamnasa midar, liafuan di’ak sira ba ami…hela hanesan memória markada iha ami ida-idak nia fuan.

Ita boot nia liafuan sira, lian murak, hamnasa midar hirak ne’e ami nafatin memoriza no hela iha ami ida-idak. Adeus…. adeus….Adeus….saúdades eterna Querida Komisária Olandina Caeiro.