Comissão da Função Pública

Díli, 11 Dezembru 2025 – Komisaun Funsaun Públika (KFP) no Ministériu Justisa realiza Formasaun Karákter ba dahuluk no nu’udar formasaun pilotu ba Funsionárius Ajentes Administrasaun Públika (AP) ho tema “DEZENVOLVE FUNSIONÁRIU HO KARÁKTER FORTE NO INTEGRIDADE”. Formasaun ne’e, ne’ebé partisipa hosi funsionárius na’in 100, hala’o iha Salaun Retiro Dare no sei dura ba semana tolu (11-23 Dezembru 2025 no 2026).

Formasaun Karákter ne’e nu’udar prioridade ida husi KFP mandatu IV nia 18 iha Reforma Rekursu Umanu Administrasaun Públika Timor-Leste, hodi responde ba Programa IX Governu Konstitusionál. Inisiativa ne’e bazeia ba Rezolusaun Governu Nú. 58/2025, 15 Outubru, ne’ebé atu hametin étika, disiplina, lideransa, no sentidu servisu públiku funsionárius hotu-hotu nian, hodi promove Administrasaun Públika ida ho integridade, efisiénsia, no kompromisu ba valór sira Estadu nian.

Objetivu prinsipál mak atu kuda metin prinsípius no valór ba dezenvolvimentu pesoál, hametin reziliénsia, étika, no integridade nu’udar pilares fundamentál iha atendimentu públiku, hasa’e kualidade, profisionálidade, no produtividade funsionáriu públiku sira.

Ministru Justisa (MJ) Sérgio Hornai agradese no fó parabéns ba KFP ba sira-nia vizaun naruk kona-ba polítika formasaun ne’e. Tanba formasaun ne’e atu hametin koñesimentu funsionáriu foun sira (atús 200+) ba jestaun, administrasaun públika, inklui lideransa, liuliu ba Servisu prizionál no Diresaun Jeral Terras no Propriedades – Sentru Nasional Kadastrais nia funsionariu hamutuk atus ida.

Ministru Justisa dehan, formasaun karakter ne’e ninia konteúdu foka ba karáter, profesionalizmu, étika, no deontolojia, ne’ebé realiza lansamentu ne’e hanesan pilotu ida, ne’ebé KFP sei halo avaliasaun hodi fó kontinuasaun ba instituisaun seluk iha futuru. Atu reitera vontade IX Governu nian atu hasa’e kualidade prestasaun servisu ajente funsionáriu públiku sira-nian.

Nune’e, Prezidente Komisaun Funsaun Públika, Agostinho Letêncio de Deus esplika, formasaun ne’e obrigatóriu bazeia ba Rezolusaun Governu no. 58/2025, atu fó ba funsionáriu foun sira no mós funsionáriu permanente sira. KFP iha kompeténsia atu koordena ho instituisaun relevante sira hodi hala’o formasaun pilotu ne’e hala’o semana rua iha Dare no semana ida iha Manutelolau foka ba reziliensia hodi dezenvolve mentalidade formandu sira, hafoin faze pilotu, KFP sei aprezenta ba Konsellu Ministru atu formula kurríkulu ida adekuadu.

Hafoin abertura, entrega mós material atributu ba formandu sira.

Formasaun ne’e hala’o ba funsionárius ajentes Administrasaun Públika na’in 100 ne’ebé foin rekruta iha tinan 2024, kompostu hosi: Guarda Prizionais: 52 (Feto: 14, Mane: 38), no Sentru Nasionál Kadastrais (CNC): 48 (Feto: 25, Mane: 23) ho total partisipante: Feto 39 no Mane 61.

Formasaun ne’e sei kobre komponente hanesan: Karakter, Ierarkia no Disiplina, Sidadania, Patriotizmu, no Nasionalizmu, Abilidade Profisionál (Jestaun Efisiente, Serbisu Ekipa, Rezolve Konflitu).

Komisaun Funsaun Públika responsabiliza ba koordenasaun dezenvolvimentu kurríkulu no servisu hamutuk ho instituisaun relevante sira. Partisipasaun iha atividade sira-ne’e nu’udar komplementu obrigatóriu ba rejime formasaun no dezenvolvimentu profisionál ne’ebé vigora. Formadór sira mai hosi Komisaun Funsaun Públika, no Forsa Defeza Timor-Leste (F-FDTL) ne’ebé responsavél orden unida.