Comissão da Função Pública

Komisáriu Portefoliu Forsa Traballu, José Telo Soares Cristovão ho ninia komitiva partisipa serimónia tomada de posse ba Dirijente foun sira iha Regiaun Administrativa  Espesial  Oe-Cusse-Ambeno (RAEOA), iha salaun Hotel  OEUPU, segunda-feira, 28/10/2024.

Dirijente foun ne’ebé simu posse hamutuk ema nain 159 kompostu feto nain  30 no mane 129 mai husi sekretariu regional administrasaun, saúde, Agrikultura no dezenvolvimentu rural, edukasaun juventude no solidaridade sosial, terras no propriadade no notariadu, sekretáriu regional finansas. Husi ema nain 159 ne’e kargu nu’udar Diretor ema nain 16, Adjuntu Diretor nain 13, Diretor eskolar nain 13, inspetor eskolar nain 9, xefe departamentu nain 37, xefi seksaun nain 9, no Prezidenti Konsellu Administrasaun nain 1.

Iha diskursu Komisáriu José Telo Soares Cristovão ba emposadu sira husu atu kaer metin kompromisu termu juramentu ne’ebé aposta ba konfidensialidade, pontualidade servisu, salva guarda segredu no jura atu serví ba rai no povu ho responsabilidade, la haree ba koor no polítika.

Komisaun Funsaun Públika  ejize nafatin ba kargu birokrasia Administrasaun Públika iha RAEOA atu servisu hamutuk ho Prezidente Autoridade no Sekretáriu rejional sira atu aselera diskusaun ba lei orgánika ba RAEOA  no Komisaun Funsaun Públika  prontu fó apoiu. Komitementu KFP nian hahú  destaka pontu fokal ida hanesan Diretor Funsaun Públika hodi fó apoiu servisu ba Sekretáriu Regional Administrasaun ba jestaun rekursus umanus, dehan Komisáriu KFP.

José Telo Soares Cristovão husu mós kargu xefia sira ne’ebé simu ona posse atu servisu ho lealdade, onestidade, pontualidade, espíritu servisu hamutuk ho entidade hotu iha RAEOA atu lori mudansa di’ak ba dezenvolvimentu. Hatudu integridade, responsabilidade servisu ba atendimentu públiku atu fó solusaun ba tratamentu Bileti Identidade, pasaporte no atendimentu saúdu ba komunidade ne’ebé durante ne’e kontinua iha preokupasaun públiku.

Entretantu Prezidente Autoridade RAEOA, Rogério Tiago de Fátima Lobato iha diskursu ko’alia kona-ba Hino Nasional “Patria-Patria Timor Leste a Nossa Nasaun, Gloria ou povo e aos herois da Nossa Libertação” ne’ebé ho signifikadu boot katak, maske Timor Leste iha ano patria ida maibé atu manán pátria ne’e liu husi prosesu naruk no ema barak sakrifika vida ba prosesu luta ba ukun rasik aan no ba hirak ne’ebé  sei moris iha responsabilidade atu hatutan hodi servi povu no nasaun.

Prezidente Autoridade RAEOA husu ba dirijente foun sira ne’ebé simu posse, jura atu hatudu  lealdade ba servisu Estadu no Governu liu-husi estabelesimentu estrutura administrasaun ida hodi asegura mákina Estadu nu’udar kontinuasaun husi estrutura anterior, tamba RAEOA rasik seidauk iha lei orgánika.

Rogerio Tiago de Fátima Lobato subliña, Lei orgánika oras ne’e asesor jurídiku RAEOA halo hela preparasaun ba diskusaun no bainhira finaliza ona sei aprezenta ba Konsellu Ministru atu halo diskusaun no aprovasaun ba ajustamentu. RAEOA mós planu atu harí Konsellu Konsultivu ne’ebé sei envolve mós lidera komunitáriu no entidades relevante sira atu servisu hamutuk lori dezenvolvementu ba povu Oe-Cusse.

Serimónia tomada de posse ba dirijente foun Regiaun Oe-Cusse, konta partisipasaun koordenador Komisaun Ezekutiva Zona Espesial Ekonomia Dezenvolvimentu Oe-Cusse Ambeno (CE-ZEEDOA), Sekretáriu Regional sira iha RAEOA, Komandante PNTL, no F-FDTL, no familia emposadus no Diretor sira husi Sekretariadu Komisaun Funsaun Públika.