Comissão da Função Pública

Dili – Prezidente juri rekrutamentu ajente foun PNTL nian, Jose Soares ho ekipa hala’o enkontru ho Prezidente Komisaun Funsaun Públika, Agostinho Letêncio de Deus no Komisaria Anita Tavares Ribeiro de Jesus hodi hato’o agredesementu no apresiasaun ba Prezidente KFP ba apoiu fasilidade no apoiu tekniku ba teste eskrita elektronika ba kandidatu ajente PNTL foun sira, tersa feira, 20 Outubru 2026 iha Gabinete Prezidente KFP nian Matadoro, Dili.

Iha enkontru ne’e prezidente juri ba prosesu selesaun ba kandidatu ajente foun PNTL`nian, Jose Soares lori Komandante Geral nia naran, no Komisaun Supervizão no Fiskalizasaun husi Ministeriu Interior nomos husi Provedor Direitus Humanus no Justisa-PDHJ, Komisaun Anti Korupsaun-KAK, hakarak hato’o obrigado no agradesementu bo’ot teb-tebes ba KFP, ne’ebe bele fo ona espasu ba Policia Nasional Timor Leste (PNTL) hodi bele realiza ona prova kultural durante loron sanulu resin ida-11 nia laran, no ida ne’e hanesan historia foun ida ba PNTL durante tinan rua nulu resin eziste.

Tuir Presidente juri nia hare katak ho esforsu husi KFP ho nia pesoal sira nia esforsu no apoiu, prosesu ne’ebe maka sistematiku no fasilidade ba jestaun baze dadus kandidatu sira nian, buat hotu la’o iha liña koordenasaun entre ekipa tekniku husi KFP no ekipa tekniku PNTL ninian, nune’e mos ekipa observador kontribui ba prosesu atividade sira tuir prosedimentu to’o remata.

Iha momentu ne’ebe mos Presidente juri louva ekipa fiskalizasaun sira hotu nia dedikasaun no prestasaun servisu ne’ebe maka di’ak tebes to’o prova kultural ba kandidatu ajente foun PNTL nian hamutuk, 11. 391 ne’e ohin loron bele remata no buat hotu la’o ho di’ak tebes.

Iha parte seluk Prezidente Komisaun Funsaunn Públika, Agostinho Letêncio de Deus hateten, Primeiro KFP nia hare no halo evaluasaun, KFP agradese ba PNTL, KFP ho PNTL resolve hela estadu nia problema bo’ot ida, tamba antes ne’e, PNTL hasoru hela problema iha tinan kotuk liu ba, entaun iha nivel internasional sira hare katak Timor Leste bele rezolve problema sira hanesan ne’e ka lae, ida ne’e kestaun primeiro atu hodi hatene no hadi’a.

Presidente KFP hateten, komisaun rekrutamentu ida agora ne’e bele dehan, komandante ka prezidente juri ho ekipa tomak mai iha fatin ne’e hodi resolve problema ne’ebe maka liu ona iha tinan kotuk nian, nune’e ba oin problema ki’ik sira hanesan ne’e, bele resolve no ba oin instituisaun no servidor estadu la’o di’ak liu tan. Presidente KFP nia hare katak durante tinan rua nulu resin ona ukun rasik’an, maibe sei depende nafatin ba ema seluk, ne’ebe resolve neineik no KFP mos agradese ba PNTL, tamba liu husi PNTL nia problema bele resolve ho sistema KFP nian no bele mos promove ona KFP ba estadu no maluk timor hotu, ne’ebe KFP halo sistema ida ne’e para muda ona ema nia mentalidade no halakon nepotizmu, familiarizmu, no seluk tan, atu ho sistema ida ne’e bele garante transparante, bele hatene ona ema nia kualidade, para ba oin servisu di’ak liu tan ba povo  no nasaun RDTL.