Comissão da Função Pública

Prezidente Komisaun Funsaun Públika (KFP), Faustino Cardoso  Gomes sai orador hodi ko’alia kona-ba rejime Jurídiku ba kargos diresaun no xefias iha Administrasaun Públika iha serimónia lansamentu kursu formasaun obrigatória lideransa iha âmbitu implementasaun polítika reforma administrasaun públika, ne’ebé hala’o iha salaun Madres Canossiana Baucau iha Segunda feira, foin lalais ne’e (24/04/2023).

Durante aprezentasaun Prezidente KFP, Faustino Cardoso Gomes sita liu kona-ba dekretu lei nú.25/2016 nu’udar baze jurídiku ba polítika formasaun no oinsá asegura formador sira hodi hala’o formasaun ba lideransa ezekutiva iha administrasaun públika hodi hasa’e liu tan kualidade lideransa iha orden birokrátiku hodi mellora prestasaun servisu ba públiku, ba povu no ba nasaun. No sita mós kona-ba oinsá entidade hotu servisu hamutuk ho KFP no INAP hodi haree ba dekretu lei nú.25/2016 artigu 5 alinea 2  ne’ebé presiza kria instrumentu operasional ida atu oinsá fó impaktu ba dezenvolvimentu kareira no promosaun hodi asegura dezenvolvimentu kareira nu’udar baze ba polítika formasaun obrigatóriu lideransa ezekutivu iha administrasaun públika ba iha futuru.

Orador seluk, Ministru Prezidensia Konsellu Ministru, Fidelis Manuel Leite Magalhães ne’ebé ko’alia kona-ba reforma administrasaun públika no kapasitasaun rekursu umanus ne’ebé destaka liu kona-ba polítika formasaun atu kria lideransa tranformativu, hodi asegura servisu administrasaun públika refleta ba kontekstu Timor-Leste hodi mellora prestasaun servisu ba atendimentu públiku ida ho efikasia, efisiensia, no lalais hodi kompete ba mudansa teknologia modernu.

Entretantu Diretor Jeral INAP, Agustinho Letêncio De Deus esplika, kursu formasaun obrigatóriu ba lideransa ezekutivu ho objetivu atu mellora kualidade prestasaun servisu, mellora jestaun no lideransa, promove atetudi no komportamentu funsionáriu públiku sira nia, apoiu reforma mudansa instituisaun administrasaun públika no mellora responsabilidade funsionáriu sira nia servisu iha prosesu atendimentu públiku.

Kursu lideransa ezekutivau ne’e partisipante mai husi nivel diretor jeral, inspetor husi liñas ministeriais sira ne’ebé kompostu husi nain 20, feto nain 9 no mane nain 11.

Kursu ne’e hahú iha, (11-28/04/2023) iha INAP no kontinua ho prátika ho atividade drama no seluk tan ne’ebé haree liu ba oinsá lider ida foti desizaun, jere servisu ho rekursu umanus, kria planu estratéjiku ba servisu no oinsá foti desizaun relasiona ho lakuna sira ne’ebé mak iha.

Serimónia lansamentu kursu formasaun obrigatória ba lideransa ne’e ensera ho asina plaka husi Ministru Prezidensial Konsellu Ministru, Fidelis Manuel Leite Magalhães.