Comissão da Função Pública

Kandidatus nain 200 partisipa iha teste elektróniku iha Aikurus Binani, Komisaun Funsaun Públika, Matadouro, Dili iha tersa-feira, (25 /04/2023).

Kompetisaun vaga 5 ne’e aplikante hamutuk nain 1480, maioria feto mak okupa pursentu aas iha 68% no mane 32%, no kandidatus ne’ebé maka admitidu ba teste eskrita iha sistema elektrónika hamutuk 200 kompostu husi feto 121 no mane 79 ba vaga ne’ebé Institutu Nasional Saúde (INS)- Ministériu Saúde estabelese no fasilita husi Komisaun Funsaun Públika.

Iha abertura Prezidente Júri reprezenta husi Jacinto de Oliveira Guterres, enkoraja ba kandidatus sira atu bele hatudu sira nia matenek no kapasidade atu responde perguntas no hetan pontuasaun boot hodi prenxe vaga sira ne’e.

Kandidatus sira ne’ebé tuir teste ne’e envolve mai husi funsionáriu públiku atu hadia sira nia kareira no hasa’e grau, balun ajente administrasaun públika atu hadia sira nia estatutu ba permanente no mós kandidatus balun ne’ebé husi liur signifika seidauk inklui kategoria rua tantu pernanente no ajente, maibé sira hatudu duni sira nia vontade hodi konkore hamutuk mós ho sira ne’ebé servisu ona.

Prezidente Júri subliña, se mak prepara di’ak sei hetan rezultadu di’ak no se mak la prepara di’ak sei husik hela oportunidade ba tempu seluk.

Iha tempu hanesan Diretora Nasional Rekrutamentu no Dezenvolvimentu Karreira Funsaun Públika, Marcelina Irene dos Santos Mesquita reprezenta Komisaun Funsaun Públika informa, entre kandidatus hotu ita boot sira mak selesionadu (Terbaik) iha selesaun dokumentus hamutuk 200 pessoas tamba ne’e, ita boot sira rasik mak sei deside manan eh lakon no rezultadu orsida bele hare kedas iha dasboard depois de teste.     Partisipa iha abertura ne’e e membru painel juri no apoia husi ekipa téknika no ba teste ne’e sei la’o ba sesaun dader no lokraik iha loron ida nia laran.