Comissão da Função Pública

Prezidente no Komisariu nain haat enkontru ho S.Exa Primeiru Ministru Taur Matan Ruak hodi fó pareser kona-ba polítika reforma iha Administrasaun Públika.

KFP  hato’o pareser kona-ba polítika reforma Administrasaun Públika ne’ebé nesesariu duni ba Primeiru Ministru hodi informadu kona-ba vantajens no desvatajen sira molok ba tama iha enkontru Konsellu Ministru.

Pareser ne’e pontu importante ne’ebé destaka iha pareser refere iha âmbitu atu hasa’e efisiensia, efikasia iha prestasaun servisu Funsaun Públika.

“Baibain PM temi reforma ne’ebé mak governu atu hala’o inklui mos reforma iha administrasaun públika, KFP mai atu haree no fó pareser sira ligadu ho Funsaun Públika ninian atu hesa’e liu tan efisiensia, efikasia, profisional, halo prestasaun servisu ho kualidade iha Funsaun Públika nian ho satisfasaun ba iha Públiku,” esplika Prezidente KFP, Faustino Cardoso Gomes hafoin enkontru ho PM, Taur Matan Ruak iha Gabinte PM, iha Palasiu Governu, (08/09/2020).

Prezidente hateten, KFP la’os atu halo polítika maibé atu implementa polítika governu nian, kestaun relevansia no la relevansia kabe ba Membru Governu sira, KFP nia dever mak atu hatoo pareser, nune’e wainhira sira hola dezisaun mós sira hatene ona ninia vantajen no desvantajen sira no kestaun urjensia no la urjensia mós fila hikas ba polítika governu.