Comissão da Função Pública

Prezidente, Komisárius, Sekretariu Ezekutivu no funsionárius públiku sira no ajente administrasaun públika realiza atividade sunu lilin iha resinto Komisaun Funsaun Públika hodi homenazear eroi sira ne’ebé mak mate ba independensia ita nia pátria.

KFP foti isiativa sunu lilin ne’e hanesan sentidu atu fo homengem ba mártires pátria, hafoin rezultadu konsulta popular husi Nasoens Unidas ne’ebé proklama vitoria ba independensia pátria ba rai ida ne’ebé okupa husi Indónesia.

“Kauza husi ida  ne’e, vítima mate barak, fugiladu, bombardeadas no sunu uma no edifisiu sira iha sidade kapital no infraestrutura hotu iha teritóriu laran hodi transforma sai abu,” esplika Prezidente KFP, Faustino Cardoso Gomes.

Atividade ne’e realiza inisiativa husi Komisaun Funsaun Públika ba dahuluk hanesan ezemplu ida atu homenazear erois sira no iha tempu hanesan halo reflesaun, hodi motiva servisu ho forma atu evoka memoria sira ne’ebé husik hela husi ita nia eroi sira ne’ebé mak mate no fujiladu husi militar Indonézia no milísia sira.