Comissão da Função Pública

Ministériu Justisa ho Komisaun Funsaun Públika fó tan posse no asinatura termu aseitasaun ba resém rekrutadus ba funsionárius iha Terras no Propriedades hamutuk 122 hodi koloka ba iha munisípiu 12 ho grau D no grau E kompostu husi feto nain 55 no mane 67, ne’ebé realiza iha kinta-feira, (10/04) iha Auditórium Ministériu Justisa, Colmera, Díli.

Iha diskursu komisáriu Agapito da Conceição ein nome Prezidente KFP sai testamuña ba posse no asinatura termu aseitasaun ne’e hateten, Administrasaun Públika Timor-Leste rejista tan konkista ida iha ambitu mákina estadu nian, pasu estratejiku ida atu kontribui ba kualidade no seriedade prestasaun iha terras no propriedades nian.

Komisáriu KFP ba portefóliu disiplinar ne’e esplika, tuir estatutu funsaun públika ba pessoal ida adere ba Administrasaun Públika iha direitu no regalias sira ne’ebé benefisia nu’udar ajente estadu hodi hala’o knár tenke kumpri ba regras  hodi hatudu lealdade no responsabilidade. Tanba funsionárius ne’ebé kolokadu iha Terras no Propriedades responsavel ba rai ne’ebé iha Territoriu laran tomak ne’ebé ho estatutu kompleksu,  tanba rai ne’ebé pertense ba kultural nia regulamentu balun sei kontradiz ho lei Estadu nian, maibé fiar katak emposadu sira sei liu formasaun ida atu hetan kapasitasaun hodi rezolve tuir regulamentu Estadu ne’ebé vigora.

Nune’e Ministru Justisa, Sergio Hornai enkoraja empossadu sira atu obedese no leal ba superiores bazeia ba lei no Konstituisaun, reprezenta Institisaun no reprenzeta soberania Estadu nian, atu hateten Timoroan hamrik ho nia ain rasik, Ema nain 122 ne’e atu kontribui ba buat ne’ebé positivu ba ita nia an, iha servisu fatin, ba ita nia sosiedade no Estadu.

Ministru Justisa ne’e dehan, fó ita nia kontribuisaun ba sidadaun sira, hatudu ita nia responsabilidade, onestidade no transparensia hanesan servidor Estadu, la inklina ba kór, organizasoens ka familiares.