Comissão da Função Pública

Primeira vizita Embaixador Índia ba Timor-Leste mai Komisaun Funsaun Públika hodi ko’alia kona-ba kooperasaun iha formasaun no kapasitasaun ba funsionárius públikus iha Administrasaun Públika no mós área importante ida iha Informátika Teknolojia (IT) iha cyber security nian.

Iha vizita ida ne’e Embaixador Índia ba Timor-Leste, S.E Shri Madan Kumar Ghildiyal iha agradese tebes ba Komisaun tanba bele simu nia ho di’ak hodi diskute kona-ba kooperasaun iha multi formasaun no kapasitasaun iha área espesialidade sira ba funsionárius públikus, liuliu iha digitalizasaun, jestaun, akuntabilidade, lian inglês,no kursu seluk tan, ho objetivu ida atu kontinua kapasita no dezenvolve funsionárius públiku sira nia kapasidade ba iha atendimentu públiku ba dezenvolvimentu ekonomia no paíz.

Iha fatin hanesan Prezidente Komisaun Funsaun Públika, Agostinho Letêncio de Deus hateten, Komisaun mai ho ninia kompetensia ida mak atu promove administrasaun públika ida efikaz, no halo jestaun ba iha rekursu umanus iha nivel administrasaun públika. Nune’e iha kooperasaun ida ne’e Komisaun hakarak atu kontinua kapasita no dezenvolve koñesimentu funsionáriu sira, no ida mós Governu Timor-Leste daudaun ne’e foku liu ba mós iha E-Governansa iha Teknolojia Informatika nian.

Komisaun fiar katak, ba futuru sei hametin liután kooperasaun ho Governu Índia liu husi embaixada ninia prezensa hodi diskute téknikamente ba iha formasaun no kapasitasaun ba funsionáriu públiku hahú husi nivel nasionál to’o munisipal sira iha área  oin-oin ne’ebé presiza atu dezenvolve, tanba formasaun no treinamentu sira ne’e parte ida husi kareira funsionárius públikus sira ne’ebé presiza tebes, alende ne’e toka mós kona-ba oinsá atu dezenvolve no digitaliza lista prezensa iha funsaun públika.

Entretantu, Embaixador Índia mós partilla esperiensia Índia nian ligadu ba formasaun iha digitalizasaun no formasaun sira seluk, no importante ida mak iha cyber security nian ne’ebé mak Governu Índia  hakarak atu apoia ba Komisaun.

Hafoin enkontru ne’e, hala’o mós vizita ba iha salaun teste Aikurus Binani, no Unidade Dezenvolvimentu ba Sistemas Informasaun iha Funsaun Públika. No partisipa iha enkontru ne’e Komisária ba Portfóliu ba Dezenvolvimentu Kareira Espesiais Anita Tavares Ribeiro de Jesus, Sekretária Ezekutiva Maria da Costa Oliveira, Diretor Nasionál Planeamentu Kuadru Pessoal iha Funsaun Públika Francisco da Costa Pereira, Xefe Unidade Dezenvolvimentu ba Sistemas Informasaun iha Funsaun Públika, Marfilho Fidel Alvares Pereira no Xefe Gabinete Rosvita Calapez Pires.