Comissão da Função Pública

Relasiona ho polítika Komisaun Funsaun Públika nian ne’ebé iha kompeténsia sira ba jestaun rekursu umanus hahú husi planeamentu mapa pessoal, rekrutamentu, promosaun, formasaun, to’o reforma. Iha mós papél importante ida mak sira hala’o mak atu kontinua asegura servisu profisional no livre husi iregularidade sira inklui lae la asédiu iha funsaun públika nafatin sai dever importante funsionárius nian, atu nafatin iha ambiente servisu ida konfortavél no di’ak ba ema hotu atu hala’o knár.

Nune’e iha Segunda-feira, 20 Outubru 2025, Prezidente Komisaun Funsaun Públika Agostinho Letêncio de Deus, informa ba públiku kona-ba servisu KFP ninian, liga ho asediu seksual ka problema ne’ebé akontese no komete husi funsionariu públiku ka ajente Administrasaun Públiku sira, ne’e Komisaun kontinua rejista kazus iregularidade sira inklui asédiu hodi halo investigasaun ba funsionáriu ka infratór ne’ebé mak komete.

Komisaun Funsaun Públika espesífikamente iha tinan ida ne’e to’o ohin loron halo ona invetigasaun ba kazu tolu ba asédiu seksual, entre kazu sira ne’e balun hetan ona sansaun, no balun sei hein hela prosesu investigasaun tuir mai. Maibé ita hotu hatene katak, bainhira akontese abuzu ka asédiu seksual ne’e pesoal ka individu entre ema nain rua (2), tamba ne’e KFP sempre halo apuramentu no halo investigasaun ba ema nain rua refere ida ne’ebé mak komete no mós ida ne’ebé mak vítima. Husi ida ne’e mak bele hetan verdade husi kazu refere, tamba ne’e KFP liu husi Komisáriu ne’ebé responsavel ba asuntu Disiplinar sei nafatin kontinua halo investigasaun liu husi Diresaun Nasional Etika Disiplinar no Prosedimentu Administrativu (DNEDPA). Ba kualker kazu ne’ebé mak relata mai KFP liu-liu ba kazu asediu seksual, no bainhira KFP atu fó sansaun ruma tenke liu husi investigasaun mak foin fó pena ba ema ne’ebé komete, esplika Prezidente KFP.

Autoridade Funsaun Públika ne’e dehan, antes ne’e KFP foti desizaun, no KFP liu husi DNEDPA tun ba terenu hodi halo investigasaun, depois mak foti desizaun no fó sansaun, tamba ne’e KFP kontinua hala’o ninia mandatu ida ne’e atu nafatin asegura disiplina, atu ema hotu atu servisu iha fatin ne’ebé de’it sente konfortavel. Bainhira ita deside no foti desizaun ba kazu ida ita tenke iha razaun ka  faktus ruma, atu nune’e vítima labele sai tan vítima ba dala rua, ida ne’e mak sansaun sira ne’ebé mak KFP foti ona no balun ne’ebé mak sei iha hela prosesu nian laran. KFP fó sansaun mak pena por eskrita no boot liu demisaun ka demite. Husi tinan hira liu ba kotuk mós KFP demite ona funsionáriu balun ne’e mak komete kazu ne’ebé mak nia grau ne’e bo’ot. Nune’e mós kona-ba problema ida iha semana kotuk viral iha medsos iha UNTL ne’e KFP seidauk simu karta ruma husi UNTL, entaun KFP hein hela bainhira karta to’o ona KFP, mak KFP sei tun direta halo investigasaun ba ema ne’ebé komete no investiga mos vítima refere.