Comissão da Função Pública

DÍLI, 31 Jullu 2026 – Prezidente Konsellu Administrasaun Banku Nasionál Komérsiu Timor-Leste (BNCTL), Januário da Gama, ho ekipa téknika BNCTL hala’o enkontru ho Prezidente Interinu Komisaun Funsaun Públika (KFP), José Telo Soares Cristóvão, ho Komisária ba Asuntu Dezenvolvimentu Karreira Espesiál, Anita Tavares Ribeiro de Jesus, no ekipa téknika KFP, iha sala enkontru KFP, Matadouro, Díli.

Enkontru ne’e nia objetivu mak atu ko’alia kona-ba prosesu rekrutamentu BNCTL nian, ne’ebé sei hala’o tuir padraun legal no regulatóriu sira, no atu uza fatin no sistema teste eletróniku KFP nian ba prosesu selesaun kandidatu foun BNCTL.

Iha enkontru ne’e, parte rua konkorda katak antes hala’o teste sei asina Memorandu Entendimentu (MoU) ida atu estabelese kooperasaun ofisiál entre BNCTL no KFP. Akordu ida-ne’e sei sai nu’udar baze legal ba implementasaun prosesu teste ne’e no dokumentu ofisiál ida ba Banku Sentral no Auditor Eksternu sira.

Prezidente Konsellu Administrasaun BNCTL, Januário da Gama, dehan katak ba dala uluk BNCTL sei husik sistema rekrutamentu manual no muda ba sistema teste dijitál, hanesan sistema ne’ebé KFP uza hela. Tuir nia, sistema foun ida-ne’e sei aumenta transparénsia, prevene reklamasaun sira no hamenus dúvida hosi públiku kona-ba rezultadu prosesu rekrutamentu.

Iha sorin seluk, Prezidente Interinu KFP, José Telo Soares Cristóvão, dehan katak KFP nia knaar mak fasilita fatin, sistema teste no apoiu tékniku de’it, inklui akompaña bainhira iha problema tékniku ruma. Maibé, responsabilidade tomak ba jestaun no ezekusaun prosesu teste ne’e hela nafatin iha BNCTL.

Iha remate enkontru, ekipa BNCTL no KFP halo vizita ba sala teste eletróniku KFP nian. Tuir planu ne’ebé iha, teste rekrutamentu ne’e sei hala’o iha fulan Agostu 2026.