Comissão da Função Pública

Manatuto, 30 Agostu 2026 — Komemorasaun Loron Konsulta Popular dala 27, ho tema “Lori Esperansa ba Mundo”, hala’o iha Munisípiu Manatuto, Domingu (30/8/2026), nu’udar parte husi festa popular ne’ebé Governu Konstitusionál IX deside hala’o iha munisípiu ne’e.

Atividade komemorasaun hahú ho marsa saudável, ne’ebé hahu husi Ponte Monsenhor Martinho da Costa Lopes to’o Obratu, akompaña ho Dran Band, ne’ebé kompostu husi estudante sira husi Escola Secundária Geral Kay Rala Xanana Gusmão no Escola Secundária Geral Santo António Manatuto.

Membro Governu, autoridade sivíl no militár, reprezentante Komisaun Funsaun Públika, Provedoria Direitus Humanus no Justisa, estudante sira no komunidade partisipa iha marsa saudável ne’e ho entusiasmu.

Iha Obratu, atividade kontinua ho aprezentasaun músika husi grupu Dran Band, seguidu ho sorteiu hodi fahe prémio ba partisipante sira, hanesan telefone, laptop, mákina fase roupa no fasilidade sira seluk, depois ida ne’e kontinuasaun kedas ho konserto músika hodi diverte komunidade sira.

Komemorasaun Loron Konsulta Popular ba dala 27 ne’e la’ós de’it hala’o iha Munisípiu Manatuto, maibé mos hala’o iha munisípiu sira seluk, liuliu iha nivel komunidade no entre estudante sira iha eskola.

Iha Misa Agradesimentu hodi komemora loron Konsulta Popular, Padre Paróquia Santo António Manatuto Mário da Costa Mello Cabral hateten, liu tiha ona tinan 27, memória istórika la’ós signifika atu fila fali ba kotuk, maibé atu rekoñese korajen, terus no sakrifísiu povo Timor-Leste nian durante tinan barak.

Nia hateten, memória istórika ne’e tenke transforma esperiénsia destrusaun no difikuldade sira ne’e sai oportunidade atu hari nasaun soberanu no demokrátiku, ne’ebé orienta ba dignidade povo nian.

“Memória fó hanoin kona-ba ita mai husi ne’ebé. Konstituisaun hatudu oinsá atu organiza Estadu ida ne’e, no dezenvolvimentu determina dalan atu atinji objetivu moris di’ak nian,” dehan Padre Mário.

Nia mós subliña katak desizaun governante sira ohin loron ne’e tenke konsidera impaktu ba jerasaun sira iha futuru, atu iha tinan 50 mai, jerasaun sira bele sente katak desizaun sira ne’ebé foti ohin loron nian kontribui duni ba ukun-rai no dezenvolvimentu nasaun nian.

Iha parte seluk, Diretor Ezekutivu CHEGA, Hugo Fernandes, haktuir fila fali mensajen husi Prezidente Nicolao Lobato nian iha loron 29 fulan Novembru tinan 1975, bainhira Prezidente Nicolao Lobato halo investidura ba Prezidente Francisco Xavier do Amaral iha Palásiu Nobre Lahane.

Hugo Fernandes hateten katak, mensajen ne’e fó énfaze ba responsabilidade lideransa nian iha prosesu lori nasaun no povo ba dalan ne’ebé los, hodi dehan : “Simu ba knar ne’e no tula ba o nia kabas, nasaun no povo ne’e atu lao ba dalan los ka dalan sala, ne’e iha Prezidente nia responsabilidade. Se ita hatene, ita bele, ita sei manan,” ne’e nu’udar mensajen ne’ebé nia haktuir.

Nune’e nia husu ba governante sira atu refleta ba mensajen istóriku ne’e no hala’o servisu ho responsabilidade, komitimentu no dedikasaun, liuliu iha luta ba dezenvolvimentu no moris di’ak ba povo no nasaun tomak. Komemorasaun loron Konsulta Popular ba dala 27 ne’e sai mós nu’udar momentu atu hametin memória istórika, unidade no esperansa, no inspira gerasaun ohin no aban nian atu kontinua kontribui ba hari Timor-Leste ne’ebé soberanu, demokrátiku no dignu ba ninia povo.