Comissão da Função Pública

Kinta-feira, 7/11/2024 – Komisáriu  Portefóliu ba Pensaun no Reforma, Fausto Freitas da Silva “Liurai Taci”, Asesor Jurídiku, Diretor DNSIGFP, Diretor DNPQFP, hamutuk ho Senior Profesional Komisaun Funsaun Públika halo enkontru konsultasaun ida ho Diretor Jeral,  Diretor Nasional, xefe departamentu, pontu fokal ne’ebé akompaña husi asesor jurídiku husi Ministériu Ensinu Superior, Ministériu Edukasaun, Ministériu Saúde, Ministériu Negósiu Estranjeiros no Kooperasaun no Instituto Nasional Seguransa Sosial (INSS) hodi diskute ajenda prinsipal rua mak Lei nú.7/2024  kona-ba Autorizasaun legislativa ba Governu ba matéria Fixasaun limite idade relasaun ho traballu Funsionárius públikus no Ajentes Administrasaun Públika ne’ebé Parlamentu Nasionál aprova ona iha fulan kotuk liubá ho idade 65 ne’ebé promulga ona husi Prezidente Repúblika iha loron 15 fulan Outubro 2024 no iha ajenda seluk atu hamosu mós proposta dekretu lei subsídiu reintegrasaun reforma. 

Objetivu husi konsultasaun ne’e atu rona sujestaun, ideia sira hafoin konsultasaun remata sei submete fali ba Governu atu foti desizaun. 

Iha abertura enkontru ne’e Komisáriu Fausto Freitas da Silva Liurai Taci esplika, Komisaun Funsaun Públika liu husi Konsellu Ministru aprezenta autorizasaun legalidade ba Parlamentu Nasional no iha loron 7 fulan Outubro 2024 Parlamentu Nasional liu husi Dekretu Lei nú.13/VI Autorizasaun Legislativa ba Governu iha material fiksasaun limite idade ba reforma Lei nú.7/2024 ba reforma obrigatóriu ho idade 65. Ligadu ba lei ne’e haree mós ba rejime espesial no rejime jeral mak presiza halo koordenasaun hodi diskute no simu hanoin sira hodi akumula sai referensia ba substánsia proposta lejislativa ida, ligadu ba reforma obrigatória no oinsá hamosu subsidio ba reforma.

Entretantu asesor jurídiku, José Reali liu husi ninia aprezentasaun iha enkontru ne’e esplika, Governu husu ba Parlamentu Nasional autorizasaun lejislativa ne’ebé Parlamentu aprova ona lei nú.7/2024 fó autorizasaun ba Governu atu altera estatutu Funsaun Públika iha artigu 116 no estabelese idade limite ba servisu iha ámbitu Funsaun Públika nian ne’ebé fó tempu ba Governu prazu loron 180 atu regula liu husi konsultasaun regulamentu sira sai dekretu lei, ne’ebé mak Governu sei aprova liu husi kriasaun proposta dekretu lei. Autorizasaun Parlamentu iha pontu 5 importante maka autoriza atu aumenta kauza ba relasaun servisu iha artigu 116 ho fixa limite idade atu aumenta artigu ruma ba estatutu ne’e atu implementa limite idade. Revoga lejislasaun kontrariu no posibilidade atu implementa sirkuntasia no situasaun esesaun ruma permite grupu ruma atu ba kontinua servisu depois reforma.

Asesor jurídiku KFP, José Reali esplika, liu husi enkontru ne’e Komisaun Funsaun Públika hakarak rona kareira espesial ligadu ba sirkustansia ruma tuir entendimentu no presiza grupu ruma kontinua servisu depois tinan 65 ba reforma. 

Iha konsultasaun ne’e diskute mekanizmu ba funsionáriu rejime espesial ne’ebé maioria, hanesan setór edukasaun nian ba professores sira, setór saúde nian hanesan profisionais saúde sira no ba rejime jeral nian ne’ebé reforma tiha mak instituisaun sei presiza mak sei kontrata hikas ba kontratu foun.