Comissão da Função Pública

Darwin-Austrália, 2-4 Setembru 2026 — Delegasaun Komisaun Funsaun Públika (KFP) Timor-Leste, liderada husi Prezidente KFP, Sr. Agostinho Letêncio de Deus, hamutuk ho Komisáriu Autoridade Aduaneira, Sr. Joanico Pinto, Sekretária Ezekutiva KFP, Sra. Maria da Costa Oliveira, no membru delegasaun sira, konklui vizita estudu ba Office of the Commissioner for Public Employment (OCPE), Northern Territory, Austrália, ne’ebé hala’o hosi loron 2 to’o loron 4 fulan Setembru tinan 2026, ho tema“Strengthening Public Administration and Civil Service Reform”.

Vizita ne’e destina atu fahe esperiénsia no aprende prátika diak iha jestaun Funsaun Públika, no identifika referénsia relevante ne’ebé bele adapta atu apoiu prioridade reforma administrasaun públika iha Timor-Leste.

Durante vizita, espesialista sira hosi unidade relevante iha Northern Territory Public Sector aprezenta no fahe esperiénsia prátika ho delegasaun kona-ba monitorizasaun no planeamentu forsa-trabalhu, NT Capability Framework, dezenvolvimentu kapasidade no lideransa, formasaun vokasionál no planeamentu susesaun, enterprise bargaining, jestaun mudansa no reforma, jestaun risku, diversidade no inkluzaun, no dezenvolvimentu kultura organizasionál orientada ba desempenhu.

Prezidente KFP mós aprezenta prioridade sira reforma Funsaun Públika Timor-Leste no hala’o diálogu ho Commissioner for Public Employment, Ms Nicole Hurwood, no ekipa Northern Territory Government.

Troka esperiénsia ne’e fornese referénsia prátika ba KFP atu identifika abordagem ne’ebé bele ajusta tuir realidade no nesesidade reforma iha Timor-Leste.

Iha loron ikus, delegasaun partisipa iha Agency Showcase ho tema “Building a High Performing Culture” no hala’o vizita ba Charles Darwin University (CDU).

Enkontru ho CDU esplora oportunidade kooperasaun ba dezenvolvimentu rekursu umanu, ho prioridade ba língua Inglesa, formasaun vokasionál, short courses no dezenvolvimentu lideransa, no perspetiva atu progresivamente esplora programa akadémiku no peskiza konjunta, tuir prioridade no nesesidade reforma administrasaun públika Timor-Leste.

Nu’udar kontinuidade ba kooperasaun ne’e, iha tempu besik Northern Territory sei envia tékniku/especialista sira mai Timor-Leste atu akompanha no observa diretamente prosesu análize no planeamentu forsa-trabalho.

Akompanhamentu ne’e sei permite hare besik realidade no dezafiu sira iha terreno, no identifika abordagem apropriada atu hametin planeamentu no jestaun forsa-trabalho iha Funsaun Públika.

Vizita estudu ne’e hametin kooperasaun entre KFP, OCPE no CDU, no loke oportunidade ba kolaborasaun prátika iha planeamentu forsa-trabalho, dezenvolvimentu kapasidade no lideransa, formasaun no peskiza.

Kooperasaun ne’e sei kontribui atu apoiu implementasaun reforma no dezenvolve Funsaun Públika Timor-Leste ne’ebé profisionál, efisiente no sustentável. Atividade ne’e hetan apoiu husi Governu Austrália liuhosi programa PROSIVU.